Merkezi Aziýa sebitinde ykdysady hyzmatdaşlyk (MASYH) maksatnamasynyň çäginde Türkmenistanyň syýahatçylyk pudagyny ösdürmek üçin anyk çäreleriň durmuşa geçirilmegi 12-13-nji iýunda Tbiliside (Gruziýa) geçirilen syýahatçylyk boýunça iş toparynyň ikinji ýygnagynda ara alnyp maslahatlaşylan mowzuklaryň biri boldy.

Bu çärä gatnaşan Türkmenistanyň Medeniýet ministrliginiň Syýahatçylyk bölüminiň başlygynyň orunbasary, MASYH maksatnamasynyň syýahatçylyk boýunça utgaşdyryjysy Gülşat Bakyýewa ýygnagyň işi we syýahatçylyk taslamalarynyň barşy barada ýörite «Türkmenportalyň» okyjylary üçin gürrüň berdi.

«MASYH syýahatçylygy» ýygnagyna Türkmenistan, Mongoliýa, Hytaý, Pakistan, Özbegistan, Täjigistan, Gyrgyzystan, Gazagystan, Azerbaýjan we Gruziýa ýaly 10 ýurduň, şeýle hem Aziýa Ösüş Bankynyň wekilleri gatnaşdylar.

MASYH sebitinde syýahatçylygy durnukly ösdürmek, 2020—2022-nji ýyllar üçin ýerine ýetirilen işleriň hasabaty, Beýik Ýüpek ýoly syýahatçylyk web portalynyň işe girizilmegi we mümkinçilikleri artdyrmak boýunça seminar ýygnagyň Gün tertibinden orun aldy.

Mejlisde maglumat beriji, şol sanda ýurtlar we syýahatçylyk saýtlary baradaky materiallar tanyşdyryldy. Ara alyp maslahatlaşmagyň dowamynda wiza düzgünini ýeňilleşdirmek ýa-da MASYH sebitiniň ýurtlary üçin Beýik Ýüpek ýolunyň ugry boýunça wizasyz syýahaty guramak teklip edildi.

Duşuşykda döwlet we hususy pudaklar üçin mümkinçilikleri artdyrmak maksatnamasy hem hödürlendi. Duşuşyga gatnaşyjylar howanyň üýtgemeginiň MASYH-yň syýahatçylyk pudagyna edýän täsiri we bu ugurda görüljek çäreler barada öz pikirlerini, materiallaryny we tekliplerini paýlaşdylar, şeýle hem ekologik syýahatçylyga aýratyn üns berdiler.

Duşuşykda MASYH sebitiniň ýeke-täk modeline laýyklykda tassyklanan halkara derejeli gollanmalary taýýarlamak meselesi hem gozgaldy.

Gülşat Bakyýewanyň aýdyşy ýaly, Türkmenistan ÝUNESKO-nyň Bütindünýä mirasynyň sanawyna girizilen ähli taryhy ýadygärlikler, şeýle hem Garagumuň, Köýten daglarynyň, Balkan kanýonlarynyň we esasanam Awaza syýahatçylyk zolagynyň syýahatçylyk mümkinçiliklerinden söz açýan hem-de reňkli suratlar bilen bezelen materiallary taýýarlady.

Şeýle hem Türkmenistan Köýtendagda ekologik syýahatçylygy ösdürmek, «Köw-ata» ýerasty kölüniň infrastrukturasyny gowulandyrmak barada teklipleri öňe sürdi

MASYH sebitinde syýahatçylygy ösdürmek boýunça ilkinji ýygnagy 2019-njy ýylda Almatyda (Gazagystan) geçirilipdi. MASYH syýahatçylyk taslamasy Aziýanyň Ösüş Banky tarapyndan maliýeleşdirilýär we 2024-nji ýyla çenli tamamlanmagy meýilleşdirilýär. Häzirki wagtda 2030-njy ýyla çenli syýahatçylygy ösdürmegiň meselelerine garalýar.