Girmek
«Ahalyň» 23 ýaşly derwezeçisi Resul Çaryýew Türkmenistanyň futbol çempionatynyň 2022-nji ýyldaky netijeleri boýunça «Iň gowy derwezeçi» diýlip yglan edildi. Bu barada TFF-niň resmi saýty habar berdi.
Tamamlanyp barýan ýylda «Ahalyň» AFK-nyň Çempionlar ligasynda güýçli garşydaşlar bilen deňeçer oýun geçirip, 4 utuk gazanyp bilmeginde, Türkmenistanyň ýaşlar ýygyndysynyň bolsa taryhynda ilkinji gezek gatnaşýan yklym ýaryşynda ― Aziýanyň kubogynda çärýek finala çykyp bilmeginde Resulyň paýy örän uludyr. Resul şu ýyl «Ahal» bilen üç kubok gazandy. Edil «Ahalyň» özi ýaly 23 ýaşly derwezeçi hem ilkinji gezek Türkmenistanyň çempiony bolup gördi.
Professional futbol karýerasyna 2019-njy ýylda «Köpetdagda» gadam goýan Resul 2021-nji ýylyň başynda «Ahal» bilen şertnama baglaşdy. Ol «Ahaldaky» ilkinji resmi duşuşygyny 2021-nji ýylyň 14-nji maýynda AFK-nyň Kubogynda Täjigistanyň «Rawşan» toparyna garşy geçirdi.
Ol milli ýygyndydaky ilkinji duşuşygyny hem geçen ýylyň baharynda esasy derwezeçi Mämmet Orazmuhammedowyň şikes almagy bilen bagly geçirdi. Dünýä çempionaty ― 2022-niň saýlama tapgyrynda myhmançylykda geçirilen şol duşuşyk, elbetde, Resulyň ýadynda ýakymly ýatlama bilen galmady. Ol duşuşykda goraýan derwezesinden 5 gol geçirdipdi.