Prezident Serdar Berdimuhamedow Türkmenistanyň Prezidentiniň «Türkmeniň Altyn asyry» atly baýragyny almak ugrundaky bäsleşigiň çäklerinde dutarçy bagşy-sazandalaryň arasynda ilkinji gezek geçirilýän «Çalsana, bagşy!» bäsleşiginiň jemleýji tapgyryna gatnaşyjylara gutlag iberdi.

Ýurt Baştutany öz gutlag hatynda Berkarar döwletiň täze eýýamynyň Galkynyşy döwründe halkyň bagtyýarlygyny, agzybirligini, abadançylygyny, Türkmenistanyň bedew batly ösüşlerini giňden wasp etmekde bäsleşige gatnaşyjy ýaş bagşy-sazandalara döredijilik üstünliklerini arzuw edýär.

— Ata-babalarymyzdan miras galan milli sungatymyzda aýdym-sazyň, bagşyçylygyň aýratyn orny bardyr. Biz meşhur sungat ussatlarymyzdan, halypa bagşy-sazandalarymyzdan şu günlere gelip ýeten aýdym-saz sungatymyza buýsanmaga haklydyrys. Şükür bagşynyň, Amangeldi Gönübegiň, Sary bagşynyň, Täçmämmet Suhangulyýewiň, Mylly Täçmyradowyň, Sahy Jepbarowyň, Orazgeldi Ylýasowyň, Nurberdi Gulowyň, Magtymguly Garlyýewiň, Mustak Aýmedowyň, Nobat bagşynyň, Gurt Ýakubowyň we ençeme beýleki meşhur bagşy-sazandalarymyzyň ussatlyk bilen ýerine ýetiren aýdym-sazlary milli bagşyçylyk sungatymyzyň kämillik derejesini has-da belende göterdi. Halkymyzyň bagşyçylyk sungatynda «Halypa-şägirt» ýoly häzirki döwürde mynasyp dowam etdirilýär — diýip, döwlet Baştutany öz gutlag hatynda türkmen bagşyçylyk sungatynyň ägirtlerini ýatlaýar.

Prezident Serdar Berdimuhamedow: «Siz geljekde-de türkmen bagşyçylyk sungatyna çäksiz söýgi bilen döredijilikli zähmet çekip, aýdym-saz sungatymyzyň dünýäde giňden tanalmagyna we döwrebap aýdym-sazlar bilen baýlaşmagyna mynasyp goşant goşmalysyňyz. Siziň juwan kalbyňyzdan joşup çykýan şirin aýdymlar, milli saz gurallarymyzda çalýan joşgunly sazlaryňyz bagtyýar ildeşlerimizi il-ýurt bähbitli belent maksatlara ruhlandyrmalydyr.

Özboluşly owazlary, şirin mukamlary bilen dünýä ýüzünde uly meşhurlyga eýe bolan aýdym- saz sungatymyzy, milli bagşyçylyk ýollarymyzy kämilleşdirmek üçin döwletimiz tarapyndan geljekde-de uly işler alnyp barlar» diýmek bilen, ýaş bagşy-sazandalara uly ynam bildirýär.