21-nji ýanwarda Aziýa kubogy ― 2019-yň çäginde BAE-niň we Gyrgyz Respublikasynyň milli ýygyndylary 1/8 final duşuşygyny geçirdiler. Ýer eýelerinden Hamis Esmailiň duşuşygyň 14-nji minudynda geçiren pökgüsine gyrgyz futbolçylary 26-njy minutda Mirlan Murzaýewiň goly bilen jogap berdiler. Birinji ýarymy 1:1 hasabyndaky deňlik bilen tamamlanan duşuşygyň ikinji ýarymynda hasaby ýene-de ýer eýeleri ― BAE-niň futbolçylary artdyrdy. Bu gezek 64-nji minutda Ali Mabhut tapawutlandy. Hemmeleriň BAE-niň milli ýygyndysynyň 2:1 hasabyndaky ýeňşine garaşýan pursatlarynda, yklym ýaryşyna ilkinji gezek gatnaşýandygyna garamazdan, gyrgyz futbolçylary aňsat-aňsat oýny elden bermejekdigini ýene bir ýola görkezdiler. Goşmaça wagtyň ilkinji minudynda Tursunali Rustamow gyrgyz ýygyndysynyň peýdasyna hasaby deňledi. Şeýlelikde, duşuşygyň ykbaly ýarym sagatlyk goşmaça wagta galdy.

Goşmaça wagtyň birinji ýarymynyň tamamlanmagyna 2 minut galanda eminiň bellän 11 metrlik jerime urgusyny dürs ýerine ýetiren Ahmed Halil duşuşykda jemleýji sözi sözledi. Milli ýygyndylaryň duşuşygyň galan dowamyndaky hüjümleriniň hiç biri hem netije bermedi, şeýlelikde 3:2 hasabynda ýeňiş gazanan ýer eýeleri ― BAE-niň milli ýygyndysy ýaryşyň çärýek finalyna çykdy.

Aziýa kubogy, 1/8 final, 21-nji ýanwar

Abu-Dabi şäherindäki «Zaýed Sports City» stadiony, 17 784 tomaşaçy.

BAE ― GYRGYZ RESPUBLIKASY 3:2

Pökgüler: Esmail 14, Mambhut 64, Halil 103 ― Murzaýew 26, Rustamow 90+1.