Türkmenistanda dünýä bileleşigi bilen bilelikde Bütindünýä saglyk güni giňden bellenildi. Esasy baýramçylyk dabaralary we köpçülikleýin welosipedli ýöriş Aşgabatda Prezident Serdar Berdimuhamedowyň gatnaşmagynda geçirildi.

TDH-niň teswirleýşi ýaly, Bütindünýä saglyk güni türkmenistanlylaryň sagdyn durmuş ýörelgelerine ygrarlydygyny görkezmek bilen, olary täze zähmet ýeňişlerine ruhlandyrýar. Munuň özi durmuş ugurly döwlet syýasatynyň oňyn netijesidir. Halkyň abadan durmuşyny üpjün etmek bu syýasatyň ileri tutulýan wezipesidir. Şunuň bilen baglylykda, ýurtda köpçülikleýin bedenterbiýe-sagaldyş, sport hereketini höweslendirmäge möhüm ähmiýet berilýär.

Saglygy goraýyş, sport we ekologiýa ulgamlaryna degişli möhüm wezipeleri çözmekde jogapkärçilikli orny eýeleýän Türkmenistan bu babatda Birleşen Milletler Guramasy we onuň ýöriteleşdirilen edaralary, beýleki abraýly halkara we sebit guramalary bilen ýakyndan hyzmatdaşlyk edýär. Hususan-da, türkmen döwletiniň welosiped sürmek medeniýetini ösdürmek boýunça teklipleri dünýä giňişliginde uly goldawa mynasyp bolýar. Birleşen Milletler Guramasynyň Baş Assambleýasy tarapyndan 2018-nji we 2022-nji ýyllarda kabul edilen Kararnamalar munuň şeýlediginiň aýdyň güwäsidir.

Aşgabatda Bütindünýä saglyk güni mynasybetli geçirilen köpçülikleýin welosipedli ýöriş Saglyk ýolunyň başlanýan ýerinde badalga alyp, şäheriň merkezi böleginde — Ruhyýet köşgüniň ýanynda tamamlandy.

Bütindünýä saglyk güni mynasybetli Arkadag şäherinde, ýurduň ähli welaýatlarynda hem köpçülikleýin welosipedli ýörişler geçirildi. Bu ajaýyp baýram mynasybetli 1 — 7-nji aprel aralygynda Türkmenistanyň çar künjeginde dürli çäreler, şol sanda mowzuklaýyn maslahatlar, “tegelek stol” duşuşyklary, sergiler, okuw sapaklary, bedenterbiýe-sagaldyş, medeni çärelerdir dabaralar, sport ýaryşlary guraldy.