Türkmenistan geçen ýyl Azerbaýjana syýahat eden raýatlarynyň sany boýunça öňdäki 15 döwletiň hataryndan ýer aldy. Bu barada Azerbaýjanyň Döwlet syýahatçylyk agentligine salgylanyp, «Report» ýazýar.
Çeşmäniň bellemegine görä, 2024-nji ýylda 33 müňden gowrak türkmenistanly Azerbaýjana syýahat edipdir. Şeýlelikde, bu ýurda syýahat etmäge baran raýatlarynyň sany boýunça Türkmenistan 13-nji basgançakdan orun aldy.
Hasabat döwründe Azerbaýjana iň köp raýaty syýahat eden ýurt Russiýa boldy. Geçen ýyl russiýaly jahankeşdeleriň 731 müňden gowragy Azerbaýjana bardy. Bu ugurda ikinji orny Türkiýe (426,2 müň syýahatçy), üçünji orny bolsa Hindistan (243,5 müň syýahatçy) eýeledi.
Ýeri gelende bellesek, 2024-nji ýylda Azerbaýjana baran daşary ýurtly jahankeşdeleriň umumy sany 2 million 626,8 müňe deň bolupdyr. Bu görkeziji 2023-nji ýyldakydan 26 göterim ýokarydyr.
