Girmek
ABŞ-nyň Prezidenti Donald Tramp amerikaly musulman jemagat hem-de birnäçe musulman ýurtlardan bolan ilçiler üçin agzaçar sadakasyny berdi diýip, «Anadolu» neşirine salgylanýan «Daryo.uz» ýazýar.
Bu Trampyň ikinji möhletdäki Prezident wezipesinde ilkinji agzaçarydyr. Döwlet Baştutany çärede çykyşyny bagtly Remezany arzuw etmek bilen başlady. Ol 2024-nji ýylyň noýabryndaky Prezident saýlawlarynda goldandyklary üçin amerikaly musulmanlara hoşallyk bildirdi.
Tramp şeýle hem Ak Tamyň musulman jemagata beren wadasynda durýandygyny nygtady we Ýakyn Gündogarda uzak möhletleýin parahatçylygy ýola goýmak üçin yzygiderli diplomatik işi alyp barýandyklaryny aýtdy. Ol aýratyn hem Miçigan ştatynda ýaşaýan musulmanlara minnetdarlyk bildirdi.
«Men Prezident wezipesindekäm siziň bilen bile bolaryn. Men sizi goldaryn. Men siziň muny bilmegiňizi isleýärin» diýip, amerikan Prezidenti nygtady.