Ozal habar berşimiz ýaly, şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň «Euronews» telekompaniýasynyň direktorlar geňeşiniň başlygy Pedro Wargas Dawid bilen duşuşygy boldy.

Duşuşygyň barşynda «Euronews» telekompaniýasynyň ýolbaşçysy BMG-niň ygtybarly hyzmatdaşy bolan Türkmenistanyň bu iri halkara gurama bilen dialogy yzygiderli ösdürýändigini, onuň başlangyçlarynyň dünýä jemgyýetçiligi tarapyndan goldanylýandygyny belledi we mümkinçilikden peýdalanyp, Türkmenistanyň hemişelik Bitaraplygynyň şanly 30 ýyllygyna bagyşlanyp geçiriljek halkara foruma gatnaşjakdygyny aýtdy.

Pedro Wargas Dawid «Euronews» telekompaniýasynyň ýörite akademiýasynyň bardygyny belläp, bu ugurda türkmen žurnalistleri bilen özara tejribe alyşmaga, şeýle hem tehniki hyzmatdaşlygy ösdürmäge mümkinçilikleriň bardygyny nygtady.

«Euronews» telekompaniýasynyň direktorlar geňeşiniň başlygy saparynyň çäklerinde behişdi ahalteke bedewlerini synlandygyny, olaryň özünde uly täsir galdyrandygyny hem-de bu meşhur atlaryň hakyky muşdagy Gahryman Arkadagyň şeýle özboluşly bedewleriň tohum arassalygyny gorap saklamaga we geljekki nesillere ýetirmäge ägirt uly goşandynyň ähmiýetini belledi. Şeýle hem ol Türkmen halysynyň milli muzeýine baryp görendigini we türkmen halkynyň döreden bu ajaýyp sungatyny, däp-dessurlaryny metbugatda giňden wagyz etmegiň ýolbaşçylyk edýän kompaniýasy üçin uly hormatdygyny nygtady.