ABŞ-nyň Kinematografiýa sungatynyň we ylymlarynyň akademiýasy Günorta Kaliforniýany gurşap alan ýangyn zerarly «Oskar» baýragynyň gowşurylmagynyň öňüsyrasynda möhüm seneleri üýtgetmek barada karara geldi. Bu barada Variety neşirine salgylanyp, daily.afisha.ru saýty habar berýär.

On müňe golaý akademigiň gatnaşýan ses bermesiniň möhleti uzaldyldy. Ilkibaşda ony 12-nji ýanwarda tamamlamak meýilleşdirilipdi, indi bolsa soňky sene hökmünde ol 14-nji ýanwara geçirildi. Şunuň bilen baglylykda, baýraga mynasyp bolanlaryň sanawynyň yglan edilmegi öňki meýilleşdirilen 17-nji ýanwaryň deregine 19-njy ýanwarda geçiriler.

Akademiýanyň agzalaryna ýüzlenmesinde onuň Baş direktory Bill Kramer tebigy betbagtçylykdan ejir çekenlere çuňňur gynanç bildirdi. Ol Los-Anjeles sebitinde kino pudagynyň köp wekiliniň ýaşaýandygyny we işleýändigini aýratyn nygtady.

Tebigy hadysa şäheriň medeni durmuşyna hem düýpli täsir etdi: Amazon MGM Studios kinokompaniýasynyň «Boýun egmezek» («Uncontrollable»), Universal Studios kinokompaniýasynyň «Adam-möjek» («The Wolf Man») we Paramount we Max kinokompaniýalarynyň «Gowulardan gowusy bolmak: Robbi Wilýamsyň taryhy» («Being Better: The Story of Robbie Williams») ýaly birnäçe filmiň premýeralarynyň görkezilişi ýatyryldy.

Los-Anjelesde üç gün bäri dowam edýän ýangyn köp meşhur şahslaryň emläklerine uly zyýan ýetirdi. Ejir çekenleriň arasynda Adam Brodi we Leýton Mister, Jon Gudman, Kameron Matison, Riki Leýk, Anna Feris, är-aýal Spenser Pratt we Haýdi Montag, şeýle hem Billi Kristal we Ýujin Lewi ýaly ýyldyzlar bar.

«Oskar» baýragyny gowşurmak dabarasy 2-nji martda geçiriler. Dabarany Konan O'Braýen alyp barar.