Girmek
FIFA-nyň prezidenti Janni Infantino Dohada Türkmenistanyň Futbol federasiýasynyň başlygy Guwançmuhammet Öwekow bilen duşuşdy. Duşuşygyň dowamynda taraplar Türkmenistanda futbolyň ösüşi we FIFA tarapyndan federasiýanyň geljekki taslamalaryna mümkin bolan goldaw bermek barada maslahatlaşdylar.
Duşuşygyň çäklerinde Türkmenistanyň Futbol federasiýasynyň başlygy Infantino aýratyn sowgat — arkasynda guramanyň nyşany we Türkmenistanyň döwlet baýdagy şekillendirilen FIFA-nyň prezidentiniň portreti salnan el bilen dokalan türkmen halysyny gowşurdy.
«Dohada Türkmenistanyň Futbol federasiýasynyň prezidenti Guwanç Öwekow bilen duşuşmak we onuň öz ýurdunda futbolyň ösmegi üçin alyp barýan ajaýyp işleri barada eşitmek diýseň ýakymly boldy. Biz ösüş taslamalarynyň we FIFA guramasy tarapyndan TFF-nyň başlygy Öwekowyň we onuň toparynyň Türkmenistanda futboly ösdürmek boýunça alyp barýan meýilnamalaryny goldamak baradaky meseleleri ara alyp maslahatlaşdyk» diýip, Infantino öz sosial ulgamlarynda ýazdy.
Türkmenistanyň wekiliýeti federasiýanyň başlygy Guwançmuhammet Öwekowyň ýolbaşçylygynda Kataryň paýtagtyna iş saparyny amala aşyryp, ol ýerde futbolyň ösüşi boýunça birnäçe möhüm duşuşyklary geçirdi.