Ermenistan Respublikasynyň Bilim, ylym, medeniýet we sport ministriniň orunbasary Daniel Danielýan Aşgabatda Ermenistanyň Medeniýet günleriniň açylyş dabarasynda eden çykyşynda Türkmenistanyň we Ermenistanyň arasyndaky dostlugyň köp asyrlyk kökleriniň bardygyny hem-de şu günki güne çenli dowam etdirilýändigini aýtdy.

Ol: «Aşgabatda ermeni medeniýetiniň dürli ugurlary bilen sizi tanyşdyrmak biziň üçin uly hormat. Medeniýet günlerimiziň geçirilmegi, dostlukly halklarymyzy has-da ýakynlaşdyrýan, gowy däbe öwrülendigini belläsim gelýär»-diýdi.

Danielýan çykyşynda Ermenistanyň Prezidenti Waagn Haçaturýanyň Gündogaryň akyldar şahyry Magtymguly Pyragynyň doglan gününiň 300 ýyllygy mynasybetli geçirilen «Döwürleriň we siwilizasiýalaryň özara arabaglanyşygy – parahatçylygyň we ösüşiň binýady» atly halkara forumyna gatnaşmak üçin ýaňy-ýakynda Türkmenistana amala aşyran iş saparynyň ähmiýetini nygtady.

Ministriň orunbasary Türkmenistanyň Prezidenti Serdar Berdimuhamedowa «Magtymguly Pyragy» medeni-seýilgäh toplumynda meşhur nusgawy şahyrlardyr akyldarlar bilen bir hatarda, ady rowaýata öwrülen ermeni şahyry we kompozitory Saýat Nowanyň heýkeliniň oturdylandygy üçin aýratyn minnetdarlyk bildirdi.

Ministriň bellemegine görä, iki ýurduň hökümetleriniň arasynda 2023 — 2025-nji ýyllar üçin medeniýet we sungat pudagynda hyzmatdaşlyk maksatnamasyna gol çekilmegi medeni gatnaşyklary ösdürmegiň möhüm tapgyry boldy. Bu resminama Ermenistanda Türkmenistanyň medeniýet günleriniň çäginde 2023-nji ýylyň iýun aýynda gol çekilipdi.

Mundan başga-da, Daniýelýan iki ýurduň sungat işgärleriniň döwletara festiwallara, bäsleşiklere işjeň gatnaşýandyklaryny belläp geçdi.