Garaşsyz Döwletleriň Arkalaşygynyň Tohumçylyk meseleleri boýunça hökümetara utgaşdyryjy geňeşiniň başlygynyň orunbasary, ylymlaryň doktory, akademik Iwan Kuzmin şu gün Köpetdagyň eteginde gurlan, Arkadag şäheri bilen tanyşdy. Bu barada «Watan» habarlar gepleşiginde habar berildi.

Bellenilişi ýaly, şäherdäki Akhan binasy akademik I.Kuzminiň ünsüni çekdi. Ol binany ýakyndan synlamak bilen, onuň ýerine ýetiriliş aýratynlygyny aýratyn nygtady. Arkadag şäheriniň çäklerine gadam basan dessine özünde şeýle uly täsir galdyran şäher bilen tanyşmak myhmanda uly höwes döretdi.

I.Kuzmine Aba Annaýew adyndaky Halkara atçylyk akademiýasy we bu ýerde alnyp barylýan işler barada hem gürrüň berildi. Arkadag şäheriniň ikinji tapgyrynda gurulmagy meýilleşdirilen Türkmen oba hojalyk uniwersitetiniň peýda boljak ýerinde myhmana guruljak täze ýokary okuw mekdebiniň taslamasy we şekil çyzgylary görkezildi.

Arkadag şäheri bilen tanyşlygyň dowamynda, bu ýerdäki üzümçilik meýdany alymyň ünsüni çekdi. Ol bu ýerde ösdürilip ýetişdirilýän üzümleriň we beýleki miweli baglaryň aýratynlyklary bilen gyzyklandy. Akademige gürrüň berlişi ýaly, bu ýerde üzümiň hem-de miweli baglaryň, şol sanda şetdalynyň dürli görnüşleri ösdürilip ýetişdirilýär.

Myhman Arkadag şäheriniň häkimligine-de baryp gördi. Bu ýerde oňa Arkadag şäherinde gurulmagy meýilleşdirilen Oba hojalyk uniwersitetiniň binalar toplumynyň, ylmy-barlag däneçilik we ekerançylyk institutlarynyň taslamalary hem-de şekil çyzgylary görkezildi.

«Watan» habarlar gepleşigi üçin beren interwýusynda GDA-nyň Tohumçylyk meseleleri boýunça hökümetara utgaşdyryjy geňeşiniň başlygynyň orunbasary, ylymlaryň doktory, akademik I.Kuzmin Arkadag şäheri, onuň oba hojalyk we ekologiýa ulgamlaryndaky üstünlikleri hem-de bu ugurda amala aşyrylmagy meýilleşdirilýän beýleki işleriň ählisi bilen tanyşmagyň özünde ýatdan çykmajak ýakymly täsirleri galdyrandygyny aýtdy.