Girmek
16-njy fewralda Türkmenistanyň Ermenistan Respublikasyndaky Adatdan daşary we Doly ygtyýarly Ilçisi Muhammetgeldi Aýazow Ermenistanyň Suratkeşler birleşiginiň başlygy Suren Safarýan bilen duşuşdy. Bu barada Türkmenistanyň Ermenistandaky diplomatik wekilhanasynyň metbugat gullugy habar berdi.
Duşuşygyň dowamynda taraplar iki dostlukly döwletiň sungat eserlerini ýaýbaňlandyrmak, sergileri geçirmek, dürli medeni çäreleri guramak meseleleriniň üstünde durup geçdiler.
Ilçi M.Aýazow Ermenistanyň Suratkeşler birleşiginiň Martiros Sarýan adyndaky sergiler zalynda Türkmenistanda 2024-nji ýylyň «Pähim-paýhas ummany – Magtymguly Pyragy» ýyly diýlip yglan edilmegi we Magtymguly Pyragynyň doglan gününiň 300 ýyllygy mynasybetli guralan serginiň üstünlikli geçirilendigi üçin S.Safarýana minnetdarlyk bildirdi.
Taraplar medeni hyzmatdaşlygyň çäklerinde, hususan-da medeniýet we sungat boýunça umumy sapaklary, okuwlary geçirmekde özara hyzmatdaşlygy mundan beýläk hem ösdürmek babatynda ylalaşdylar. Diplomat M.Aýazow geljekki meýilnamalary durmuşa geçirmekde ilçihana tarapyndan degişli goldawlaryň beriljekdigini belläp geçdi.