Girmek
Italiýa Respublikasynyň Bilim, uniwersitetler we gözleg ministrliginiň binasynda Türkmenistanyň Adatdan daşary we Doly ygtyýarly ilçisi Toýly Kömekow bilen ministriň diplomatik geňeşçisi Lamberto Mariýa Morussiniň arasynda duşuşyk geçirildi. Bu barada Türkmenistanyň ilçihanasynyň metbugat gullugy habar berdi.
Taraplar Türkmenistanyň Prezidentiniň 2019-njy ýylyň noýabr aýynda Italiýa Respublikasyna eden sapary wagtynda gazanylan şertnamalaryň ýerine ýetirilişine, şeýle hem iki ýurduň uniwersitetleriniň arasynda gol çekilen Hyzmatdaşlyk Ähtnamasynyň düzgünleriniň we maddalarynyň ulanylyşyna syn berdiler.
Dürli ugurlar boýunça Italiýanyň uniwersitetlerinde tejribe alyşmak we türkmen talyplaryny taýýarlamak boýunça mümkinçilikler ara alnyp maslahatlaşyldy. Italiýada okaýan türkmen talyplaryna Italiýada tejribe geçmek üçin çakylyk geldi.
Duşuşygyň ahyrynda taraplar Türkmenistan bilen Italiýa Respublikasynyň arasyndaky ikitaraplaýyn gatnaşyklary ösdürmek we çuňlaşdyrmak boýunça işjeň gepleşikleri geçirmäge taýýardyklaryny tassykladylar.