Şu gün Türkmenistanyň Prezidenti Serdar Berdimuhamedow «Türkmenistan — ABŞ» işewürler geňeşiniň ýerine ýetiriji direktory Erik Stýuarty kabul etdi. Bu barada «Watan» habarlar gepleşiginde habar berildi.

Bellenilişi ýaly, işewür türkmen döwletiniň Baştutanyna wagt tapyp kabul edendigi we ikitaraplaýyn hyzmatdaşlygyň ileri tutulýan meselelerini ara alyp maslahatlaşmaga döredilen mümkinçilik üçin tüýs ýürekden hoşalyk bildirip, amerikan işewür toparlarynyň ägirt uly ykdysady kuwwata eýe bolan we dürli pudaklarda iri taslamalary durmuşa geçirýän Türkmenistan bilen netijeli gatnaşyklary ösdürmäge çalyşýandygyny tassyklady.

Söhbetdeşlikde jenap Erik Stýuart Prezident Serdar Berdimuhamedowyň şu ýylyň sentýabrynda Nýu-Ýorka bolan iş saparynyň ähmiýetini belledi. Şeýle-de Türkmenistanyň döwlet Baştutanynyň BMG-niň Baş Assambleýasynyň 78-nji mejlisinde eden çykyşynda beýan eden oňyn başlangyçlarynyň we Merkezi Aziýa — Amerikanyň Birleşen Ştatlary formatyndaky («C5+1») köptaraply hyzmatdaşlygyň birinji duşuşygyna gatnaşmagynyň ähmiýeti nygtaldy.

Prezident Serdar Berdimuhamedow hoşniýetli sözler üçin minnetdarlyk bildirip, Türkmenistanyň Amerikanyň Birleşen Ştatlary bilen däp bolan dostlukly gatnaşyklary ösdürmäge uly ähmiýet berýändigini belledi. Döwlet Baştutany Aşgabatda 10-njy bilelikdäki işewürler forumynyň üstünlikli geçirilmegini arzuw etdi we onuň türkmen-amerikan maýa goýum hyzmatdaşlygyny pugtalandyrmaga ýardam etjekdigine ynam bildirdi.

Duşuşygyň barşynda deňhukuklylyk, birek-birege hormat goýmak we özara bähbitlilik ýörelgeleri esasynda yzygiderli ösdürilýän ikitaraplaýyn hyzmatdaşlygyň okgunly häsiýeti bellenildi. Şunda Türkmenistanyň we ABŞ-nyň uzak möhletleýin esasda köpugurly hyzmatdaşlygy giňeltmäge taýýardyklary tassyklanyldy. Döwletara söwda-ykdysady gatnaşyklary ösdürmekde işewürler geňeşiniň saldamly goşandy bellenildi. Şeýle-de amerikan işewür toparlarynyň köp sanly wekilleriniň Türkmenistan bilen gatnaşyklara uly gyzyklanma bildirýändikleri nygtaldy. Bellenilişi ýaly, nebitgaz ulgamy, elektrik energetikasy, gaýtadan dikeldilýän energetika, ulag we kommunikasiýalar, obasenagat toplumy, ýokary tehnologiýalar ulgamy we beýlekiler hyzmatdaşlygyň geljegi uly ugurlarydyr.

Prezident Serdar Berdimuhamedow türkmen-amerikan işewürler gatnaşyklaryny ösdürmäge, netijeli döwletara dialogy pugtalandyrmaga ýardam edýän netijeli işi üçin jenap Erik Stýuarta minnetdarlyk bildirip, Türkmenistanyň ABŞ-nyň kompaniýalary bilen netijeli gatnaşyklaryň pugtalandyrylmagyny goldaýandygyny we Işewürler geňeşi tarapyndan anyk tekliplere garamaga taýýardygyny belledi.

Işewür Türkmenistanyň döwlet Baştutanyna netijeli söhbetdeşlik we ikitaraplaýyn hyzmatdaşlyk meselelerine uly üns berýändigi üçin hoşallyk bildirip, ABŞ-nyň işewür toparlarynyň amatly maýa goýum ýagdaýy döredilen geljegi uly türkmen bazarynda orunlaryny pugtalandyrmaga gyzyklanma bildirýändiklerini ýene bir gezek tassyklady.

Duşuşygyň ahyrynda Prezident Serdar Berdimuhamedow we işewür türkmen-amerikan ykdysady hyzmatdaşlygynyň köpýyllyk oňyn tejribä daýanyp, uzak möhletleýinlik we özara bähbitlilik esasynda mundan beýläk-de okgunly ösdüriljekdigine ynam bildirdiler.