Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Türki Döwletleriň Guramasynyň 10-njy sammitine gatnaşmak üçin 3-nji noýabrda Gazagystan Respublikasynda iş saparynda bolar. «Watan» habarlar gepleşiginde habar berlişi ýaly, bu barada şu gün Prezident Serdar Berdimuhamedowyň sanly ulgam arkaly geçiren nobatdaky Hökümet mejlisinde aýdyldy.

Mejlisiň barşynda wise-premýer, daşary işler ministri R.Meredow türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň Astana şäherinde geçiriljek Türki Döwletleriň Guramasynyň 10-njy sammitine gatnaşmak maksady bilen Gazagystan Respublikasyna amala aşyrjak iş saparyna taýýarlyk görlüşi barada hasabat berdi.

Hasabatda Türkmenistanyň 2021-nji ýylyň 12-nji noýabrynda Türki Döwletleriň Guramasyna synçy hökmünde goşulandygy, türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň bu guramanyň Ýaşulular geňeşiniň agzasydygy we onuň işine işjeň gatnaşýandygy bellenildi.

Şeýle-de häzirki wagtda türkmen tarapynyň Türki döwletleriň söwda-senagat edaralarynyň birleşigine girmegi bilen bagly degişli işleriň geçirilýändigi barada aýdyldy.

Wise-premýer, daşary işler ministri R.Meredowyň belleýşi ýaly, Astana şäherine boljak saparyň çäklerinde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň Gazagystan Respublikasynyň Prezidenti Kasym-Žomart Tokaýew bilen duşuşygy meýilleşdirilýär.

Prezident Serdar Berdimuhamedow wise-premýer, daşary işler ministri R.Meredowa türkmen wekiliýetiniň Türki Döwletleriň Guramasynyň sammitine gatnaşmagynyň ýokary guramaçylyk derejesini üpjün etmegi tabşyrdy.