Girmek
Şu gün Hytaýyň Gansu welaýatynyň Dunhuan şäherinde «Ýüpek ýoly» VI halkara medeni sergisiniň açylyş dabarasy boldy.
Türkmenistandan bu sergä iki muzeý gatnaşýar — Döwlet medeniýet merkeziniň Döwlet muzeýi we Şekillendiriş sungaty muzeýi. Türkmenistanyň pawilýonynda görkezilen täsin eksponatlar türkmen halkynyň baý medeni mirasyny görkezýär.
«Türkmenistan: Altyn asyr» neşiriniň habar berşi ýaly, stendlerde suratlar, türkmen halylary, aýal-erkek eşikleri, şaý-sepler, öý goş-golamlary we dokma önümleri sergilenýär.
Köp sanly suratlar bolsa myhmanlary Türkmenistanyň ösüşiniň häzirki döwri bilen tanyşdyrýar.
«Ýüpek ýoly» EXPO-nyň açylyş dabarasynda Hytaý Halk Respublikasynyň Döwlet Geňeşiniň Wise-premýer Sun Çunlan Dunhuandaky häzirki serginiň medeniýet pudagynda alyş-çalyş we hyzmatdaşlygy ösdürmek üçin möhüm meýdança bolandygyny belledi.
Ozal Türkmenistanyň on sany muzeý hünärmenlerinden ybarat wekiliýetiniň «Ýüpek ýoly» altynjy halkara medeni sergisine gatnaşjakdygy barada habar beripdik.