Türkmenistanyň Prezidenti Serdar Berdimuhamedow hem-de türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Russiýa Federasiýasynyň Prezidenti Wladimir Putine Mahaçkala şäherindäki awtomobillere ýangyç guýujy beketde bolup geçen partlamanyň adam pidalaryna we şikes ýetmelere getirmegi zerarly çuňňur gynanç bildirdiler. Bu barada «Watan» habarlar gepleşiginde habar berildi.

Bellenilişi ýaly, iberen gynanç hatlary bilen Türkmenistanyň Prezidenti we Halk Maslahatynyň Başlygy şu agyr pursatda gurban bolanlaryň dogan-garyndaşlaryna hem-de ýakynlaryna Türkmenistanyň halkynyň we Hökümetiniň, Halk Maslahatynyň adyndan, şeýle-de hut öz atlaryndan ýürekden gynanjyny, medet beriji sözlerini ýetirdiler, ejir çekenlere bolsa tiz wagtda sagalmaklary baradaky dileglerini beýan etdiler.

Maglumat hökmünde ýatlatsak, Russiýanyň Derňew komiteti deslapky geçiren işleri boýunça Mahaçkaladaky partlamanyň ýangyjyň saklanylyş düzgünleriniň bozulmagy sebäpli ýüze çykan bolmagynyň mümkindigi barada habar berýär.

Derňewiň netijesine görä, ýangyn awtoulaglara hyzmat edilýän bölümde başlanypdyr, soň bolsa nebithimiýa dökünleriniň saklanýan otagyna ýaýrapdyr. Az wagtdan ýangyn golaýdaky ýangyç bekedine baryp ýetipdir. Habarda bellenilişi ýaly, partlamanyň bolan ýerinde oba hojalygynda dökün hökmünde ulanylýan ammiak selitrasynyň haltalary tapylypdyr.

Russiýanyň Adatdan daşary ýagdaýlar ministrliginiň täzelenen maglumatlaryna görä, ýangyç bekedinde bolan ýangynda 105 adam ýaralanyp, olaryň 35-si aradan çykypdyr.

15-nji awgustda Dagystanda ýas güni yglan edildi.