Türkmenistanyň ÝUNESKO-nyň ýanyndaky hemişelik wekili Maksat Çaryýew Pariž şäherinde ÝUNESKO-nyň Baş edarasynda geçýän «Medeni taýdan özüňi görkezmegiň dürlüligini goramak we höweslendirmek hakyndaky Konwensiýa» agza-döwletleriň dokuzynjy maslahatyna gatnaşdy.

6-njy iýunda bolan maslahatyň açylyşynda Prezidiumyň agzalary saýlandy, maslahatyň gün tertibi we sekizinji maslahatyň jemleýji hasabaty tassyklandy. Sekretariat 2021-nji we 2023-nji ýyllar aralygyndaky işler baradaky hasabatynda agza döwletleriň maslahatynyň soňky mejlisinden bäri üç sany täze döwletiň Kapo Werdeniň, Pakistanyň we Türkmenistanyň bu Konwensiýa goşulandygyny habar berdi.

Konwensiýa agza döwletleriň wekilleri maslahatyň açylyş dabarasynda eden çykyşlarynda bu ýurtlary 2005-nji ýyldaky Konwensiýa we medeni dürlüligiň halkara hereketine goşulandyklary bilen mähirli gutladylar. Bu barada Türkmenistanyň DIM-niň resmi saýtynda habar berildi.

Ilçi M.Çaryýew öz çykyşynda Türkmenistanyň sungatyň, senetleriň, aýdym-sazlaryň we tanslaryň däp bolan görnüşlerini gorap saklamak, şeýle hem medeni dürlüligi we medeniýetleriň arasyndaky gepleşikleri ösdürmek ugrundaky tagallalaryna ünsi çekdi. Ilçi Türkmenistanda medeni merkezleriň we muzeýleriň döredilendigi, medeni festiwallaryň geçirilýändigini, dürli medeni däp-dessurlara has çuňňur düşünmäge goşant goşýan çeper alyş-çalyşlaryň goldanýandygyny nygtady. Şeýle hem ilçi Türkmenistanyň Konwensiýanyň maksatlaryny we wezipelerini durmuşa geçirmäge işjeň gatnaşmaga taýýardygyny mälim etdi hem-de ÝUNESKO we ähli gatnaşyjy ýurtlar bilen hyzmatdaşlygy dowam etdirmäge ygrarlydygyny belläp geçdi.

Şu ýylyň 6 — 8-nji iýuny aralygynda geçirilýän Dokuzynjy maslahatda, Konwensiýa gatnaşýan 152 döwletiň we Ýewropa Bileleşiginiň wekilleri Konwensiýanyň ýerine ýetirilişine we pandemiýadan soňky döwürde medeni we döredijilik pudaklarynyň öňünde durýan esasy kynçylyklara syn bererler. Hususan-da, sanly gurşawda medeni aňlatmalaryň dürlüligini ýokarlandyrmagyň, medeni önümler we hyzmatlar üçin ýeňillikli bejeriş çärelerini üpjün etmegiň we suratkeşlerdir medeni hünärmenleriň ýagdaýyny berkitmegiň ýollaryny ara alyp maslahatlaşarlar.

Türkmenistan «Medeni taýdan özüňi görkezmegiň dürlüligini goramak we höweslendirmek hakyndaky Konwensiýa» 2021-nji ýylyň iýul aýynda goşuldy.