Girmek
Ýewropa çempionlar ligasynyň çärýek final tapgyrynyň deslapky oýnunda «Mançester Siti» öz öýünde «Bawariýany» ýeňlişe sezewar etdi. «Ettihad» stadionynda geçirilen oýun 3:0 hasabynda ýer eýeleriniň ýeňşi bilen tamamlandy. Bu ýeňliş «Bawariýa» üçin ÝÇL-iň şu möwsümindäki ilkinji şowsuzlyk boldy.
«Mançester Sitiniň» düzüminde Rodri (27), Bernardu Silwa (70) hem-de Holand (76) tapawutlandy.
Ýeri gelende bellesek, Holand «Bawariýanyň» derwezesine gol urmak arkaly bu möwsümde «Mançester Sitiniň» düzümindäki gollarynyň sanyny 45-e ýetirdi. Şeýlelikde, norwegiýaly hüjümçi APL-da çykyş edýän klublaryň oýunçylarynyň arasynda bir möwsümde 45 gol uran taryhdaky ilkinji oýunça öwrüldi. «Mançester Sitide» debýut möwsümini geçirýän Holand häzire çenli APL-da 30 gola, ÝÇL-de 11 gola, Angliýanyň Kubogynda 3 gola hem-de Angliýanyň Liga kubogynda 1 gola awtorlyk etdi. 45 golluk sepgidi zabt etmek üçin hüjümçä 39 oýun ýeterlik boldy.
«Bawariýa» bilen «Mançester Sitiniň» arasyndaky jogap oýny geljek hepdäniň çarşenbe güni oýnalar.