1. Rustam Minnihanow Türkmenistana iş sapary bilen geldi. Aşgabadyň howa menzilinde Tatarstan Respublikasynyň Prezidentini Türkmenistanyň Daşary işler ministriniň orunbasary Berdinyýaz Mätiýew we Russiýanyň Türkmenistandaky Adatdan daşary we doly ygtyýarly ilçisi Aleksandr Blohin garşy aldylar. Saparyň çäklerinde Rustam Minnihanow türkmen-rus işewürlik forumynyň mejlisine, Arkadag şäherindäki Ahal welaýatynyň baş metjidiniň düýbüni tutmak dabarasyna gatnaşar, şeýle hem «KAMAZ» AGPJ-niň Aşgabatdaky tehniki hyzmat merkezine baryp görer.

2. «Türkmenistan» awiakompaniýasy 2023-nji ýylyň mart aýy üçin Aşgabatdan halkara ugurlaryna awiapetekleriň onlaýn satuwyny ýola goýdy. «Türkmenistan» awiakompaniýasynyň resmi saýtynda ýa-da «iOS» we «Android» üçin ykjam programmalar arkaly uçuş tertibi barada has giňişleýin maglumatlar bilen tanşyp bilersiňiz we petekleri satyn alyp bilersiňiz.

2023-nji ýylyň 1-nji fewralyndan başlap, «Türkmenistan» awiakompaniýasynyň Russiýanyň şäherlerinden uçýan ähli howa gatnawlary aşakdaky tertip boýunça Aşgabat Halkara howa menziline uçuşlary amala aşyrarlar: Moskwa – Aşgabat – çarşenbe we anna günleri, Kazan – Aşgabat – duşenbe we penşenbe günleri.

3. Rimde Türkmenistanyň Italiýadaky ilçisi Toýly Kömekow bilen neşirýat öýüniň baş direktory Sandro Teti we türkolog professor Federiko De Rensi bilen gepleşikler geçirildi. Duşuşygyň maksady türkmen edebiýatynyň nusgawy şahyry Magtymguly Pyragynyň goşgularyny italýan diline terjime etmek we şahyryň döredijiliginiň italýan dilinde ilkinji neşiri boljak kitaby neşir etmek taslamasyny ara alyp maslahatlaşmakdan ybarat boldy.

4. Aşgabatda Türkmenistanyň daşary işler ministri Raşid Meredow bilen Türkmenistandaky Patriarhal ybadathanasynyň prihodynyň dolandyryjysy arhiýepiskop Feofilaktyň arasynda duşuşyk geçirildi. Türkmenistanyň Daşary işler ministrliginiň habar bermegine görä, duşuşygyň dowamynda ikitaraplaýyn ynsanperwerlik gatnaşyklarynyň mundan beýläk-de ösdürilmegi barada pikir alyşyldy.

Türkmenistanyň DIM-niň ýolbaşçysy Raşid Meredow Katar döwletiniň ilçisi Hamad bin Raşid bin Hamad Al-Azbi bilen hem duşuşdy. Taraplar halkara we sebit guramalarynyň çäginde iki döwletiň arasyndaky hyzmatdaşlyga, şertnama-hukuk binýadyny giňeltmek meselelerine aýratyn üns berdiler.

5. Russiýanyň federal döwlet statistika gullugy Täze ýyl baýramçylygy başlamazdan 2021-nji ýyldaky ilat ýazuwynyň netijelerini köpçülige ýetirdi. Ilat ýazuwynyň görkezişi ýaly, soňky 10 ýylda Russiýada türkmenleriň sany 4 453 adam ýa-da 12,1% artdy. 35,584 adam türkmen dilini ene dili diýip atlandyrdy.

6. Türkmenistanyň paýtagtynda Milli Geňeşiň palatalarynyň bilelikdäki maslahaty mynasybetli şäheriçi awtobuslary ýakyn wagtda boljak çäräni öňe sürýän ýazgylar bilen bezeldi. Şäheriçi awtobuslarynyň ak bortunda uzakdan «Döwletliniň ugran işi oň bolar! и Döwletli maslahat oň bolsun!» diýen açyk ýaşyl ýazgylar görünýär: ýatlatsak, 2023-nji ýylyň 21-nji ýanwarynda Aşgabatdaky Maslahat köşgünde Türkmenistanyň Milli Gengeşiniň palatalarynyň bilelikdäki maslahaty jemgyýetçilik wekilleriniň gatnaşmagynda geçiriler.

7. 18-nji ýanwarda Leningradyň gabawynyň bozulmagyna 80 ýyl dolýar. Şol gün Gyzyl Goşunyň Leningrad we Wolhow frontlarynyň goşunlary bir hepde töweregi artilleriýa taýýarlygyndan soň, şäheri gurşap alan faşistik goşunlaryň güýçli halkasyny böwsüp geçmegi başardylar. Häzirki wagtda şol pajygaly wakalaryň iki gahrymany Galina Mamedowa we Mariýa Awanesowa Türkmenistanyň paýtagtynda ýaşaýarlar. Galina Mamedowa 1943-nji ýylda Leningradda dünýä indi. 1964-nji ýylda Aşgabat şäherine göçdi. Mariýa Awanesowa 1942-nji ýylyň awgust aýynda Leningraddan halas edildip göçürildi. 1954-nji ýyldan bäri Aşgabatda ýaşaýar.

8. «Soçi» Gurban Berdiýewiň ýolbaşçylygyndaky ilkinji oýunda uly tapawut bilen ýeňiş gazandy. «Soçi» ilkinji gyşky türgenleşik ýygnanyşygynyň barlag oýnunda Taganrogyň «Forte» toparyny ýeňdi. Toparlar «Fişt» stadionynda duşuşdylar. Duşuşyk Gurban Berdýewiň toparynyň peýdasyna 5:1 hasabynda tamamlandy. Ýatlatsak, «Soçi» 17 oýunda 25 utuk gazanyp, RPL-iň sanawynda dokuzynjy orunda gyş dynç alşyna çykdy. Rus futbolynda täze möwsüm mart aýynda başlanar. RPL-iň 18-nji tapgyrynda Gurban Berdiýewiň topary «CSKA» garşy oýnar. Duşuşyk 5-nji martda Soçide geçiriler.

9. Türkmenistan Yslam ýurtlarynyň hokkeýini ösdürmek assosiasiýasynyň esaslandyryjylarynyň biri boldy. Yslam ýurtlarynyň arasynda geçirilen ilkinji «Kazan Hockey Cup» ýaryşynyň halkara hokkeý forumynda Yslam ýurtlarynyň hokkeýini ösdürmek assosiasiýasynyň iş toparynyň ilkinji ýygnagy geçirildi. 13 ýurtdan gelen wekiller hokkeýi ösdürmek, bilelikdäki sport ýaryşlaryny guramak, federasiýalaryň arasynda tejribe alyşmak boýunça hyzmatdaşlyk we özara gatnaşyklar barada ylalaşdylar.

10. Türkmenistanly tennisçiler Ilima Guseýnowa, şeýle hem Imran Ahundow we Selim Çagylow 14 ýaşa çenli oýunçylaryň arasynda Aziýanyň birinjiliginiň Merkezi we Günbatar Aziýa sebitleriniň ilkinji saýlama ýaryşynda kümüş medallara eýe boldular. Iki saýlama tapgyrdan ybarat ýaryşlar 8 ýurduň wekilleriniň gatnaşmagynda Bahreýniň Isa-Taun şäherinde geçirilýär. Ilima Guseýnowa ýekelikde ikinji orny eýeledi, Imran Ahundow we Selim Çagylow hem ikileýin görnüşde şol netijäni gazandylar.