Girmek
Amerikaly kinorežissýor Stiwen Spilberg «Fabelmanlar» atly terjimehal filmi üçin «Iň oňat režissýorlyk işi üçin» diýen ugur boýunça «Altyn globus» baýragyna mynasyp boldy. Ady tutulan baýragyň 80-nji gowşurylyşy Los-Anjelesde geçdi, ony göni ýaýlymda ýurduň NBC teleýaýlymy görkezdi.
«Iň oňat režissýorlyk işi üçin» diýen ugur boýunça baýraga Jeýms Kemeron («Awatar 2»), Baz Lurman («Elwis»), Deniel Şaýnert we Den Kwan («Ählisi hemme ýerde we birbada») hem-de Martin Makdonah («Inişeriniň Banşisi») dalaşgär görkezildi.
Iň oňat animasion ugry boýunça baýraga «Gilýermo del Toronyň Pinokkiosy» filmi mynasyp boldy.
Iň oňat aktýor diýlip, «Elwis» atly filmde rowaýaty aýdymçy Elwis Presliniň keşbini döreden Ostin Batler, iň oňat komediýa aktýory hökmünde Kolin Farrell «Inişeriniň Banşisi» filmindäki keşbi üçin mynasyp boldy.
Aktrisa Zendeýa «Eýforiýa» serialyndaky keşbi üçin özüniň ilkinji «Altyn globus» baýragyna mynasyp boldy.
«Altyn globus» 1944-nji ýyldan bäri Golliwudyň daşary ýurt metbugaty assosiasiýasy tarapyndan gowşurylýan kino baýragydyr. Ol «Oskar» kino baýragyndan soň ikinji orunda durýar. Bu barada «News.ru» ýazýar.