Girmek
Düýn Leýpsig şäherindäki «Red Bull Arena» stadionynda futbol boýunça Germaniýanyň Naýbaşy kubogy ugrundaky duşuşyk geçirildi. Onda Mýunheniň «Bawariýasy» bilen «RB Leýpsig» güýç synanyşdy.
Duşuşygyň dowamynda janköýerler derwezere sekiz pökginiň girişine tomaşa etdiler. Olaryň ilkinjisini 14-nji minutda «Bawariýanyň» futbolçysy Musaila geçirdi. Toparyň täze transferi Sadio Mane 31-nji minutda hasaby Mýunhen şäheriniň klubynyň peýdasyna 2:0-a çykardy. Birinji ýarymyň ahyrky minudynda goragçy Pawar «Bawariýanyň» üçünji pökgüsini hem geçirdi.
Birinji ýarymy 3:0 hasabynda «Bawariýanyň» peýdasyna tamamlanan duşuşygyň 59-njy minutda Halstenberg ýer eýelerini umytlandyran pökgini geçirdi. Ýöne «Bawariýa» 65-nji minuda Gnabriniň geçiren goly bilen aralygy ýene üç pökgä çenli çykardy. 77-nji minutda «RB Leýpsigiň» futbolçysy Nkunku 11 metrlik jerime urgusyndan dürs peýdalanyp, hasaby 2:4-e çenli ýygyrdy. Ýöne goşmaça wagtyň 9-njy minudynda «Bawariýa» Leroý Saneniň tapawutlanmagynda garşydaş derwezä ýene bir gezek ýol tapdy. Şeýlelikde, duşuşyk 5:3 hasabynda «Bawariýanyň» ýeňşi bilen tamamlandy.
Mýunhenliler taryhynda 10-njy gezek Germaniýanyň Naýbaşy kubogynyň eýesi boldular. Bu bolsa ýurduň futbol taryhynyň rekordydyr.