Türkmenistanly zenan samboçylar Liwanyň Juniýa şäherinde geçirilýän Aziýanyň çempionatynyň ilkinji gününde söweş sambosy boýunça medallaryň üçüsine mynasyp boldular. Olaryň ikisi kümüş, biri bürünç medaldyr.

Kümüş medallaryň birini Weronika Rus gazandy. Ol söweş sambosy boýunça zenanlaryň arasynda 54 kilograma çenli agram derejesindäki ýaryşlara gatnaşdy. Weronika Rus final tutluşygynda gazagystanly Aýana Satkynaliýewadan asgyn geldi.

Weronika Rus ozal hem halkara ýaryşlaryň birnäçesinde üstünlikli çykyş edipdi. Şolaryň hatarynda 2019-njy ýylyň maý aýynda Pariž şäherinde geçirilen Gran-pri ýaryşyny hem agzap bileris. Ol bu ýaryşda kümüş medalyň eýesi bolupdy.

Türkmenistanyň ýygyndysynyň ikinji bir kümüş medalyna Sabina Agajanowa mynasyp boldy.

Ol söweş sambosy boýunça 80 kilogramdan ýokary agramdaky türgenleriň arasynda çykyş etdi.

Final tutluşygyna çenli üstünlikli gelen ildeşimiz çempionlyk ugrundaky aýgytlaýjy tutluşykda gazagyztanly Anar Seýitimowadan asgyn geldi. Bu agram derejesinde hormat münberiniň üçünji basgançagyna bolsa özbegistanly Gulmira Ismatowa çykdy.

Angelina Filippowa bolsa söweş sambosy boýunça çykyşyny bürünç medal bilen tamamlady. Türkmenistanly türgen zenanlaryň arasynda geçirilen ýaryşyň 59 kilograma çenli agram derejesinde çykyş etdi.

Angelina hormat münberiniň üçünji basgançagyny filippinli türgen Mariane Mariano bilen paýlaşdy. Bu agram derejesinde altyn medala özbegistanly Ibodathon Agojonowa, kümüş medala bolsa gazagystanly Žanel Nabiýewa mynasyp boldy.

4-nji iýuna çenli dowam etjek yklym çempionatynda türkmenistanly samboçylaryň medallaryň ýene birnäçesini gazanmagyna garaşylýar.