Şu gün — 12-nji maýda Türkmenistanyň Prezidenti Serdar Berdimuhamedow Merkezi Aziýa döwletleriniň we Russiýa Federasiýasynyň Parlamentara forumyna we zenanlaryň dialogynyň mejlisine gatnaşmak üçin Türkmenistana gelen Özbegistan Respublikasynyň Oliý Majlisiniň Senatynyň Başlygy Tanzila Narbaýewany kabul etdi.

«Watan» habarlar gepleşiginde habar berlişi ýaly, myhman wagt tapyp kabul edendigi üçin tüýs ýürekden hoşallyk bildirip, döwlet Baştutanyna Özbegistan Respublikasynyň Prezidenti Şawkat Mirziýoýewiň aýdan mähirli sözlerini we tutuş türkmen halkyna abadançylyk baradaky arzuwlaryny ýetirdi.

Oliý Majlisiň Senatynyň Başlygynyň belleýşi ýaly, Türkmenistanyň täze saýlanan Prezidenti bilen duşuşmak onuň üçin belent mertebedir. Ol Özbegistanyň biziň ýurdumyz bilen köpasyrlyk dostluk, türkmen hem-de özbek halklarynyň doganlyk ýörelgelerine, umumy taryhyna we medeniýetine esaslanýan däp bolan gatnaşyklaryň ösdürilmegine möhüm ähmiýet berýändigini, ynanyşmak esasynda ýola goýulýan hyzmatdaşlygyň täze mazmun bilen üstüniň ýetirilýändigini aýratyn nygtady.

Hoşniýetli sözler üçin minnetdarlyk bildirip we Özbegistan Respublikasynyň Prezidentine iň gowy arzuwlaryny aýdyp, döwlet Baştutany Merkezi Aziýa döwletleri bilen özara gatnaşyklaryň ösdürilmeginiň Türkmenistanyň ählumumy bähbitleri we giň halkara hyzmatdaşlyk gatnaşyklaryny nazarlaýan daşary syýasatynyň möhüm ugurlarynyň biri bolup durýandygyny belledi.

Duşuşygyň dowamynda bar bolan gyzyklanmalary nazara alyp, netijeli gatnaşyklaryň häzirki ýagdaýy we onuň geljekki ugurlary boýunça gyzyklanma bildirilýän pikir alyşmalar boldy.

Merkezi Aziýa döwletleriniň we Russiýa Federasiýasynyň Parlamentara forumynyň we zenanlaryň dialogynyň geçirilmeginiň ähmiýetine üns berlip, duşuşyklaryň parahatçylygy, durnukly ösüşi üpjün etmekde, döwlet dolandyryş ulgamyndaky gatnaşyklary, öňüni alyş diplomatiýasyny, daşky gurşawy goramak ýörelgelerini, telekeçiligi, işewürligi, medeni, bilim, ylym we sungat gatnaşyklaryny pugtalandyrmakda, umuman, gender deňligini üpjün etmekde ähmiýetlidigi nygtaldy.

Prezident Serdar Berdimuhamedowyň aýdyşy ýaly, häzirki döwürde Türkmenistanda ägirt uly durmuş-ykdysady özgertmeler maksatnamasyny amala aşyrmakda zenanlar hereketine möhüm orun degişli bolup durýar. Şunuň bilen baglylykda, döwlet Baştutany bu gezekki forumyň Merkezi Aziýa döwletleriniň we Russiýanyň ýeten derejesi barada maglumat alyşmak, bu ugurda geljekki meýilnamalary tassyklamak we umumy gyzyklanmalara kybap gelýän sebitara gatnaşyklary ösdürmegiň geljekki ugurlaryny kesgitlemek üçin oňyn mümkinçilikdigini belledi.

Duşuşygyň ahyrynda Prezident Serdar Berdimuhamedow we Özbegistan Respublikasynyň Oliý Majlisiniň Senatynyň Başlygy ikitaraplaýyn gatnaşyklaryň köpugurly mümkinçilikleriniň durmuşa geçirilmeginiň iki ýurduň arasyndaky ählumumy abadançylyk, ösüş ugurlaryna laýyk gelýän netijeli gatnaşyklary berkitmäge hyzmat etjekdigine ynam bildirdiler.