Türkmenistanyň futbol çempionatynyň 13-nji tapgyrynda «Energetigi» 5:0 hasabynda ýeňen «Ahal» 14-nji tapgyrda şol bir hasap bilen «Aşgabatdan» üstün çykdy.

«Aşgabat» stadionynda geçirilen duşuşygyň 25-nji minudynda Gurban Annaýew «Ahaly» hasapda öňe çykardy. Birinji ýarymyň esasy wagtynyň tamamlanmagyna 1 minut galanda Güýçmyrat Annagulyýewiň geçiren dürs urgusy «Ahalyň» arakesmä 2:0 hasabyndaky artykmaçlyk bilen çykmagyny üpjün etdi.

Arakesmeden soňra Said Saidowyň şägirtleri derwezesinde ýene-de üç pökgi gördüler. 57-nji minutda Pirmyrat Sultanow, 65-nji minutda Artur Geworkýan we 67-nji minutda Ilýa Tamurkin dagylar «Aşgabadyň» derwezesine nobatdaky pökgüleri geçirdiler.

Dartgynly geçen duşuşykda baş emin Begenç Allaberdiýew «Aşgabadyň» iki futbolçysyna sary duýduryş kartyny bermeli boldy.

Paýtagtly futbol janköýerleriniň 500-sini stadiona ýygnan duşuşygyň netijesi boýunça utugyny 28-e çykaran «Ahal» hem ikinji orundaky ýerini gorady, hem-de ýaryşyň lideri «Altyn asyryň» arany açmagyna ýol bermedi. Häzir «Altyn asyr» bilen «Ahalyň» arasynda 2 utuklyk tapawut bar. Toparlaryň ikisi hem 14 tapgyrda 13 duşuşyk geçirdi.

13-nji tapgyrda «Altyn asyrdan» hem minimal hasap bilen (0:1) ýeňlen «Aşgabat» bolsa 17 utuk bilen bäşinji basgançakda galdy.

Duşuşyk ikinji aýlawyň çäginde geçirilen hem bolsa ol «Ahal» bilen «Aşgabadyň» şu ýylyň hasabyna geçiren ilkinji duşuşygydyr. Toparlar birinji aýlawdaky duşuşygyny 17-nji iýunda geçirerler.

 «Ahal» – «Aşgabat» – 5:0

Gollar:  Gurban Annaýew 25, Güýçmyrat Annagulyýew 44, Pirmyrat Sultanow 57, Artur Geworkýan 65, Ilýa Tamurkin 67.