Şu gün Türkmenistanyň Ýaponiýadaky ilçihanasynyň guramagynda Osaka şäherinde «EKSPO — 2025» Bütindünýä sergisiniň çäklerinde Türkmenistanyň Milli pawilýonynda golaýda geçirilen Türkmenistanyň Halk maslahatynyň mejlisiniň netijelerine bagyşlanan maslahat guraldy.

Çärä Türkmenistanyň Ýaponiýadaky ilçihanasynyň, «EKSPO — 2025» Bütindünýä sergisiniň guramaçylyk toparynyň we halkara jemgyýetçiliginiň wekilleri gatnaşdylar.

Maslahatyň dowamynda Türkmenistanyň Ýaponiýadaky ilçisi A.Baýramow, Ýaponiýanyň «EKSPO — 2025» boýunça assosiasiýasynyň wekili H.Nişigaki we Türkmenistanyň Milli pawilýonynyň wekili çykyş etdiler.

Agzalan çäräniň dowamynda edilen çykyşlarda Türkmenistanyň Prezidentiniň we Türkmenistanyň Halk Maslahatynyň Başlygynyň daşary ýurtlara amala aşyrýan saparlarynyň ähmiýeti, ýurduň hemişelik Bitaraplygynyň 30 ýyllygy bellenilýän Halkara parahatçylyk we ynanyşmak ýylynda dünýäde hyzmatdaşlygy hem-de özara düşünişmegi pugtalandyrmak syýasatynyň ähmiýeti, Türkmenistanyň Halk maslahatynyň mejlisiniň jemleri barada durlup geçildi.

Hususan-da, Türkmenistanyň Ýaponiýadaky ilçisi A.Baýramow öz çykyşynda Türkmenistanyň Prezidentiniň Birleşen Milletler Guramasynyň Baş Assambleýasynyň 80-nji sessiýasynda öňe süren halkara başlangyçlary we Halk Maslahatynyň mejlisinde beýan edilen netijeli teklipler barada gürrüň berdi.

Mundan başga-da, maslahata gatnaşyjylara Türkmenistanyň Milli pawilýonynyň sergi eksponatlary we ýurt baradaky tanyşdyryş wideoýazgylary görkezildi.