Düýn Türkmenistanyň Bilim ministrliginde ministriň orunbasary A.Ataýew bilen ÝUNESKO-nyň bilimde maglumat tehnologiýalary boýunça institutynyň direktory Tao Žanyň ýolbaşçylygyndaky wekiliýetiň arasynda duşuşyk geçirildi.

Duşuşygyň barşynda Türkmenistanyň ÝUNESKO bilen hyzmatdaşlygynyň syýasy ähmiýeti aýratyn nygtaldy. Bu hyzmatdaşlyk BMG-niň Durnukly ösüş maksatlaryna (DÖM) ýetmekde häzirki zaman bilim tehnologiýalarynyň ösdürilmegine gönükdirilen halkara başlangyçlara Türkmenistanyň işjeň gatnaşmagynyň bir bölegi hökmünde görkezildi. Bu barada Türkmenistanyň Bilim ministrliginiň resmi saýtynda habar berilýär.

Taraplar bilim ulgamynyň sanlylaşdyrylmagy, innowasion tehnologiýalaryň ornaşdyrylmagy we mugallymlaryň hünär derejesiniň ýokarlandyrylmagy ýaly möhüm ugurlarda hyzmatdaşlygyň geljegi barada pikir alyşdylar.

ÝUNESKO tarapyndan hyzmatdaşlygyň täze ugurlary boýunça birnäçe teklip hödürlendi: bilim infrastrukturasynyň ösdürilmegi; mugallymlaryň emeli aň boýunça ukyp-başarnyklarynyň ösdürilmegi; emeli aň tehnologiýalarynyň bilim ulgamynda baha bermek prosesine ornaşdyrylmagy; «Ömür boýy bilim almak» maksatnamasynyň çäklerinde hyzmatdaşlygyň ýola goýulmagy, şol sanda ulular üçin bilim programmalarynyň durmuşa geçirilmegi; şeýle-de ýokary okuw mekdepleriniň işine akylly bot ulgamlarynyň ornaşdyrylmagy.

Mundan başga-da, ÝUNESKO-nyň wekilleri ýaşlaryň sagdyn durmuş ýörelgesini kemala getirmek, mekdep okuwçylarynda sagdyn endikleri ösdürmek we ene-ata bilen çagalaryň arasyndaky gatnaşyklary berkitmek boýunça hyzmatdaşlygyň giňeldilmegini teklip etdiler. Bu çäreler ýurduň adam maýasyny berkitmek we ýaş nesliň sagdyn durmuş ýörelgesine ygrarlylygyny üpjün etmek maksadyna gönükdirilendir.