Girmek
Myrat Garryýew adyndaky Türkmenistanyň Döwlet lukmançylyk uniwersitetinde ýakynda 600-den gowrak uçurymlarynyň okuwy tamamlaýandygy mynasybetli dabaraly çäre geçirildi.
Olaryň 50-den gowragy okuwy aýratyn tapawutlanyp gutaranlaryndan soň hünär ugurlary boýunça hökmany tejribe döwürlerini tamamlap, tapawutly diplom almaga dalaşgär bolup durýarlar — diýip, «Neýtralnyý Turkmenistan» gazetinde habar berilýär.
Täze uçurymlar Türkmenistanyň Bilim ministrliginiň orta hünär we ýokary okuw mekdepleriniň uçurymlaryny işe ýerleşdirmek baradaky Düzgünnamasyna, şeýle hem «Kliniki ordinatura hakynda» Düzgünnama laýyklykda degişli edaralara we işgär zerurlygy bolan saglyk ulgamynyň edaralaryna ugradylar.
Bäsleşige gatnaşyp üstünlik gazanan tapawutlanan uçurymlar bolsa kliniki ordinatura ugrukdyryldy — olar şu okuw ulgamyny uniwersitetiň ýöriteleşdirilen kafedralarynda we Saglygy goraýyş we derman senagaty ministrliginiň Ylmy-kliniki merkezlerinde dowam etdirerler.