Şu gün Aşgabat şäherinde BMG-niň Ösüş maksatnamasy (BMGÖM) tarapyndan Türkmenistanyň Daşky gurşawy goramak ministrligi bilen hyzmatdaşlykda we Bütindünýä ekologiýa gaznasynyň (GEF) maliýe goldawy bilen durmuşa geçirilýän «Aral deňziniň basseýninde ýokary tebigy gymmatly ekoulgamlary we ýer serişdelerini goramak hem-de durnukly dolandyrmak arkaly köpugurly peýdalaryň gazanylmagy» atly taslamanyň çäginde tegelek stol maslahaty geçirildi.

Bu maslahat ýerleriň zaýalanmagynyň bitarap deňagramlylygyny (ÝZBD) milli meýilnama we ýerden peýdalanmak syýasatyna integrirlemek meselelerine bagyşlandy. Çölleşmä we gurakçylyga garşy göreşmegiň Bütindünýä güni mynasybetli guralan çäre Araly halas etmegiň halkara gaznasynyň (AHHG) Durnukly ösüş boýunça döwletara komissiýasynyň ylmy-maglumat merkezi bilen hyzmatdaşlykda geçirildi.

Çäräniň maksady Türkmenistanyň Çölleşmä garşy göreşmek boýunça milli meýilnamasyna ÝZBD ýörelgelerini girizmäge ýardam bermekden ybarat boldy. Duşuşykda gatnaşyjylar strategik meýilnamalaşdyrmak, tebigy serişdeler bilen bagly dürli milli syýasatlaryň utgaşdyrylmagy, şeýle-de ylmy esasly çemeleşmeleriň we häzirki zaman tehnologiýalarynyň, şol sanda ýerleriň zaýalanmagyny we gurakçylygy monitoring etmek üçin emeli hemra maglumatlarynyň peýdalanylmagynyň ähmiýeti barada pikir alyşdylar.

Hususan-da, Türkmenistanyň Çölleşmä garşy göreşmek boýunça milli meýilnamasynyň, häzirki wagtda işlenip taýýarlanylýan çäge we tozan tupanyny peseltmek strategiýasynyň, şeýle hem Gurakçylyga garşy göreşmek boýunça milli meýilnamanyň arasynda utgaşyklylygyň zerurlygyna aýratyn üns berildi. Şeýle hem gatnaşyjylar ýerden peýdalanmak ulgamyndaky hukuk we institusional binýady, ÝZBD ýörelgeleriniň milli ýer dolandyryş ulgamyna ornaşdyrylmagy bilen baglanyşykly meseleleri ara alyp maslahatlaşdylar.

Tegelek stola BMG-niň Çölleşmä garşy göreşmek boýunça Konwensiýasynyň Sekretariatynyň wekilleri, Türkmenistanyň esasy ministrlikleriniň we pudaklaýyn dolandyryş edaralarynyň, has takygy, Daşary işler ministrliginiň, Mejlisiň, Daşky gurşawy goramak ministrliginiň, Oba hojalyk ministrliginiň, Suw hojalygy baradaky döwlet komitetiniň, Bilim ministrliginiň, Maliýe we ykdysadyýet ministrliginiň, Türkmenistanyň Statistika baradaky döwlet komitetiniň we beýleki degişli edaralaryň wekilleri gatnaşdylar. Mundan başga-da, duşuşyga ylmy guramalar, maliýe düzümleri, hususy pudagyň wekilleri we ýerli häkimiýetleriň işgärleri gatnaşdy.

Geçirilen tegelek stol maslahaty ýerleriň zaýalanmagynyň bitarap deňagramlylygyna ýetmäge gönükdirilen çemeleşmeleri milli syýasatyň bir bölegi hökmünde ilerletmekde möhüm tapgyr boldy.