Türkmenistanyň Bedenterbiýe we sport baradaky döwlet komiteti sport çärelerini, şol sanda okuw-türgenleşik ýygnanyşyklaryny guramagyň täze tertibini tassyklady. Degişli 169-ö belgili karara 2025-nji ýylyň 21-nji aprelinde bu komitetiň başlygy A. Saparow gol çekdi.
Gol çekilen täze resminama laýyklykda ýurtda geçirilýän ähli sport ýaryşlary birnäçe derejä bölünýär:
- Halkara ýaryşlary – halkara sport guramalary we döwlet komitetiniň karary esasynda geçirilýär;
- Umumymilli ýaryşlar – döwlet we halkara sport çäreleriniň umumy senenama meýilnamasyna laýyklykda guralýar;
- Pudagara ýaryşlar – ministrlikler we edaralar tarapyndan döwlet komiteti bilen ylalaşmak bilen geçirilýär;
- Sebitleýin ýaryşlar – welaýatlaryň, Aşgabat we Arkadag şäherleriniň, etraplaryň derejesinde guralýar;
- Sport guramalarynyň sport çäreleri – sport klublary we ýöriteleşdirilen okuw-sport edaralary tarapyndan geçirilýär.
Täze tertibe laýyklykda sport çärelerini ylalaşdyrmagyň anyk möhletleri kesgitlenýär.
Umumymilli ýaryşlar üçin:
- Milli federasiýalar ýaryşyň geçiriljek senesinden azyndan 1 aý öň resminamalary tabşyrmaly;
- Döwlet komiteti resminamalary 10 iş gününiň dowamynda garaýar.
- Bellikler bolan halatynda — düzediş girizmek üçin 5 iş güni berilýär.
- Gutarnykly ylalaşma – 3 iş gününiň dowamynda.
Sebitleýin ýaryşlar üçin:
- Düzgünleriň tabşyryş möhleti - geçiriljek seneden azyndan 20 gün öň.
- Ýerli häkimiýetler tarapyndan garalma möhleti - 5 iş güni.
- Bellikler bolan halatynda — düzediş girizmek üçin 5 iş güni berilýär.
- Gutarnykly ylalaşma – 3 iş gününiň dowamynda.
Resminama sport ýaryşlarynyň düzgünnamasynda bolmaly esasy maddalary takyk kesgitleýär, şol sanda:
- Ýaryşyň maksady we wezipeleri;
- Gatnaşýan guramalar we türgenler;
- Arza tabşyrmagyň tertibi;
- Ýaryşyň maksatnamasy;
- Howpsuzlyk çäreleri;
- Lukmançylyk we dopinge garşy üpjünçilik;
- Ýeňijileri sylaglamagyň tertibi;
- Maliýeleşdirmegiň şertleri;
- Howpsuzlygyň talaplary.
Täze tertipde okuw-türgenleşik ýygnanyşyklaryna aýratyn üns berilýär:
- Okuw ýygnanyşyklarynyň sany, möhleti we dowamlylygy degişli federasiýalar bilen bilelikde sport guramalary tarapyndan kesgitlenýär
- Okuw ýygnanyşyklaryny geçirmegiň möhleti görkezilen sport çäreleriniň sanawyna laýyk gelmeli
- Guramaçylar tejribeli tälimçiler, lukmanlar we kömekçi işgärler bilen üpjün etmeli
- Arassaçylygyň kadalaryna, ýangyn howpsuzlygynyň we tehniki howpsuzlygyň talaplaryna doly laýyklykda geçirilmegi hökmanydyr
Täze tertibe laýyklykda hasabat bermegiň berk talaplary hem kesgitlenýär:
- Eminler kollegiýasy tarapyndan ýaryşlaryň teswirnamalary we hasabatlary 7 günüň dowamynda berilmelidir
- Okuw-türgenleşik ýygnanyşyklarynyň hasabatlary üçin hem edil ýokardaky ýaly möhletler bellenilýär
- Wezipe-borçlaryny degişli derejede ýerine ýetirmedik eminler eminlik etmekden çetleşdirilip bilner
Täze tertip 2025-nji ýylyň 29-njy maýynda Türkmenistanyň Adalat ministrliginde №1879 belgisi bilen döwlet belligine alnandan soň güýje girdi.
