Nýu-Ýork şäherinde Türkmenistanyň BMG-niň ýanyndaky hemişelik wekilhanasy tarapyndan BMG-niň Oýunlarynyň ýapylyş dabarasy guraldy. BMG-niň Ştab-kwartirasynda geçirilen dabara diplomatlaryň, türgenleriň, olaryň maşgala agzalarynyň we myhmanlaryň 300-den gowragy gatnaşdy.

BMG-niň Oýunlary BMG-niň Baş Assambleýasynyň A/RES/78/325 belgili Kararnamasyna laýyklykda, 2025-nji ýylyň aprel we maý aýlarynda geçirildi. Halkara parahatçylyk we ynanyşmak ýyly hem-de Türkmenistanyň hemişelik Bitaraplygynyň 30 ýyllygyna bagyşlanyp guralan oýunlara BMG-niň diplomatik wekilhanalarynyň, Sekretariatynyň, ýöriteleşdirilen agentlikleriniň wekillerinden, olaryň maşgala agzalaryndan jemi 800-den gowrak adam gatnaşdy. Oýunlar futbol, woleýbol, tennis, stol tennisi, basketbol, badminton, şaşka, ýoga, ylgamak we piklbol ýaly sportuň on görnüşi boýunça geçirildi.

Ýapylyş dabarasynda Türkmenistanyň BMG-niň ýanyndaky hemişelik wekili we Oýunlaryň guramaçylyk komitetiniň başlygy, ilçi Aksoltan Ataýewa çykyş etdi. Ol öz çykyşynda BMG-niň Oýunlaryny köptaraplaýyn hyzmatdaşlygyň we medeni gatnaşyklarynyň möhüm guraly hökmünde häsiýetlendirdi.

Şeýle-de bu çärede çykyş eden BMG-niň Oýunlarynyň ilçileri — Italiýanyň milli futbol ýygyndysynyň öňki kapitany we 2020-nji ýylda geçirilen Ýewropa çempionatynyň ýeňijisi Jorjio Kýellini hem-de stoluň üstünde oýnalýan tennis boýunça dünýä çempiony Lýu Gu Liang sportuň dostlugyň, dialogyň we hyzmatdaşlygyň serişdesi hökmünde möhüm ornunyň bardygyny bellediler.

Dabaranyň dowamynda ähli sport görnüşleri boýunça ýeňijilere kuboklar, medallar we ýörite baýraklar gowşuryldy diýip, Türkmenistanyň BMG-niň ýanyndaky hemişelik wekilhanasynyň metbugat gullugy habar berdi.