Girmek
Ozal habar berşimiz ýaly, şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Arkadag şäherine iş saparyny amala aşyrdy we bu ýerde Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazowyň we Arkadag şäheriniň häkimi G.Mämmedowanyň gatnaşmagynda iş maslahatyny geçirdi.
Iş maslahatynyň barşynda Arkadag şäheriniň häkimi G.Mämmedowa täze şäheriň çäklerinde Türkmen bedewiniň milli baýramyna görülýän toplumlaýyn taýýarlyk işleri barada hasabat berdi. Hasabatda Türkmen bedewiniň milli baýramy mynasybetli ýurduň atşynaslar toparyna täze ýaşaýyş jaýlarynyň açarlarynyň gowşurylmagynyň meýilleşdirilýändigi hakynda-da habar berildi.
Halk Maslahatynyň Başlygy milli senenamada möhüm orun eýeleýän Türkmen bedewiniň milli baýramynyň täze şäherde geçirilmeginde çuňňur manynyň bardygyny aýtdy.
Gahryman Arkadag ähli meýilleşdirilen halkara çäreleriň, toý dabaralarynyň ýokary guramaçylyk derejesiniň üpjün edilmegi ugrunda degişli düzümleriň sazlaşykly işiniň ýola goýulmalydygyny belläp, bu babatda kesgitlenen wezipeleri degişli derejede ýerine ýetirmek ugrunda zerur tagallalaryň edilmelidigini aýtdy. Bu barada «Watan» habarlar gepleşiginde habar berildi.