Türkmenistanyň Prezidenti Merkezi Aziýa – ÝB sammitine gatnaşmak üçin Samarkanda bardy, Aşgabatda agzybirligiň, parahatçylygyň we ynsanperwerligiň baýramçylygyna bagyşlanan maslahat geçirildi, Türkmenistanda «Arabada oýnalýan tennis» başlangyjy ýola goýuldy we beýleki habarlar
Türkmenistan
1. Türkmenistanyň Prezidenti Serdar Berdimuhamedow «Merkezi Aziýa – Ýewropa Bileleşigi» görnüşindäki birinji sammite gatnaşmak maksady bilen, Özbegistan Respublikasyna iş sapary bilen ugrady. Aşgabadyň Halkara howa menzilinde döwlet Baştutanyny ýurduň resmi adamlary ugratdylar. Birnäçe wagtdan hormatly Prezidentiň uçary Samarkant şäheriniň sammite gatnaşýan ýurtlaryň Döwlet baýdaklary bilen bezelen Halkara howa menziline gondy. Howa menzilinden Türkmenistanyň Prezidentiniň awtoulag kerweni sapar wagty özi üçin niýetlenen kabulhana tarap ugrady.
2. Samarkantda Türkmenistanyň Prezidenti Serdar Berdimuhamedow Ýewropa Komissiýasynyň Başlygy Ursula fon der Lýaýen bilen duşuşdy. Taraplar häzirki wagtda özara hyzmatdaşlygyň ykdysady we energetika üpjünçiligi boýunça möhüm meseleleri öz içine alýandygyny bellediler. Döwlet Baştutany Türkmenistanyň Ýewropa Bileleşiginiň öňe sürýän «ýaşyl» energetika syýasatyna laýyklykda, täze tehnologiýalaryň ornaşdyrylmagyna, durnukly energiýa serişdeleriniň üpjün edilmegine aýratyn ähmiýet berýändigini aýtdy.
3. Türkmenistanyň Prezidenti Ýewropa Geňeşiniň Başlygy Antonio Koşta bilen Samarkantda geçirilen duşuşygyň dowamynda dürli ugurlarda özara hyzmatdaşlygy ösdürmegiň meselelerini ara alyp maslahatlaşdy. Döwlet Baştutany Türkmenistanyň Ýewropa Bileleşigi bilen syýasy-diplomatik, söwda-ykdysady, medeni-ynsanperwer, ulag we kommunikasiýa ýaly ugurlarda hyzmatdaşlygy ösdürmäge uly ähmiýet berýändigini belläp, bu duşuşygyň ÝB bilen köptaraplaýyn hyzmatdaşlygy has-da giňeltmäge ýardam berjekdigine ynam bildirdi.
4. Türkmenistanyň Prezidenti Serdar Berdimuhamedow Samarkantda Özbegistan Respublikasynyň Prezidenti Şawkat Mirziýoýew bilen duşuşdy. Duşuşygyň dowamynda söhbetdeşler häzirki wagtda ynanyşmagyň we özara goldawyň ýokary derejesi bilen tapawutlanýan türkmen-özbek gatnaşyklarynyň giň ugurlarda okgunly ösdürilýändigini kanagatlanma bilen bellediler. Oba hojalygynda, elektrik energetikasynda, nebitgaz toplumynda, himiýa senagatynda hyzmatdaşlyga aýratyn üns çekildi.
https://turkmenportal.com/blog/89605/prezident-turkmenistana-provel-vstrechu-s-glavoi-uzbekistana
5. Ýewropanyň Täzeleniş we ösüş banky (ÝTÖB) energetika, ulag we sanly ykdysadyýet ulgamlarynda Türkmenistan bilen hyzmatdaşlyga gyzyklanma bildirýär. Bu barada ÝTÖB-niň Odil Reno-Basso Türkmenistanyň Prezidenti Serdar Berdimuhamedow bilen Samarkantda geçirilen duşuşykda aýtdy.
6. Aşgabat şäherindäki «Mekan» köşgünde «Halkara parahatçylyk we ynanyşmak ýyly: agzybirligiň, parahatçylygyň, ynsanperwerligiň, dost-doganlyk gatnaşyklarynyň dünýä ýüzüne dabaralanmasy» atly maslahat geçirildi. Oňa Türkmenistanyň Hökümet agzalary, diplomatik wekilhanalarynyň we halkara guramalarynyň wekilhanalarynyň ýolbaşçylary we işgärleri, saglygy goraýyş ulgamynyň işgärleri, ýurduň ýokary okuw mekdepleriniň professor-mugallymlary we talyplary, şeýle hem jemgyýetçilik guramalarynyň we köpçülikleýin habar beriş serişdeleriniň wekilleri gatnaşdylar. Maslahatda çykyş edenleriň hatarynda ilçihanalaryň, Aşgabat we Arkadag şäherleriniň lukmançylyk we bilim edaralarynyň wekilleri, redaktorlar, şeýle hem Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň serişdeleriniň hasabyna operasiýa edilen çaganyň ejesi bar.
Dünýäde
1. 24 ýaşly amerikaly Hindi ummanynyň uzak bir adasyna rugsatsyz baryp görendigi üçin tussag edildi. Ol Bengal aýlagynda ýerleşýän Demirgazyk Sentinel adasyna bikanun baryp gördi, bu adanyň ýaşaýjylary daşarky dünýä bilen gatnaşyk etmegi düýbünden ret edýändikleri bilen tanalýarlar. Ada gelenden soň, ol kenara geldi we ýerli ilat bilen aragatnaşyk açmaga synanyşdy, şondan soň olara sowgat hökmünde bir guty gazly suw we kokos goýdy. Şeýle hem syýahatçy adalylar bilen gysga wideony ýazga almagy başardy. Amerikalynyň hereketleri hindi häkimiýetleriniň arasynda uly alada döretdi, sebäbi sentinelliler kesekilere aşa agressiw reaksiýa bildirýärler. Bu taýpa ýer ýüzünde iň izolirlenen etnik toparlaryň biri hasaplanýar.
2. 1-nji maýdan başlap, daşary ýurtly syýahatçylar Tailanda girmezden ozal onlaýn sanly kartany doldurmaly bolarlar. Anketany Tailandyň migrasiýa gullugynyň ýörite saýtynda ýurda gelmezden azyndan üç gün öň doldurmaly we onda pasport maglumatlaryňy, uçuş tertibini we ýaşajak ýeriňi görkezmeli. Anketany doldurandan soň, ýüz tutujynyň elektron poçtasyna tassyknama iberiler, ol ýurda gelnende görkezilmelidir. Immigrasiýa gullugynyň ýolbaşçylary sanly karty doldurmazdan ýurda girmegiň mümkin däldigini, sebäbi immigrasiýa gullugynyň degişli haýyşy ýerine ýetirip bilmejekdigini nygtaýarlar.
https://turkmenportal.com/blog/89620/tailand-vvodit-obyazatelnye-onlainankety-dlya-turistov-s-1-maya
Sport täzelikleri
1. Türkmenistanyň milli ýygyndysy Halkara futbol federasiýasynyň (FIFA) reýtinginde 142-nji orna çykdy. Mart aýynda Türkmenistanyň milli ýygyndysy 2027-nji ýylyň Aziýa Kubogy ugrundaky saýlama ýaryşda myhmançylykda Hytaý Taýbeýiniň milli ýygyndysyna garşy duşuşyk geçirip, 2:1 hasaby bilen ondan üstün çykdy. FIFA-nyň täzelenen reýtinginde Türkmenistanyň milli ýygyndysy Farer adalarynyň ýygyndysy bilen Litwanyň ýygyndysynyň arasynda ýerleşýär. Reýtingiň sanawynda jemi 211 milli ýygyndy bar. Dünýä reýtingindäki öňdebaryjy orny häzirki dünýä çempiony Argentinanyň milli ýygyndysy saklap gelýär. Ikinji orunda häzirki Ýewropanyň çempiony Ispaniýanyň ýygyndysy bolup, ondan soňra Fransiýanyň, Angliýanyň we Braziliýanyň milli ýygyndylary gelýär.
2. Türkmenistanda ilkinji gezek «Arabada oýnalýan tennis» maksatnamasyna badalga berildi, bu maksatnama ÝUNISEF bilen Türkmenistanyň Tennis federasiýasy (TTF) tarapyndan bilelikde amala aşyrylýar. Bu başlangyç beden taýdan maýyplygy bolan çagalara sport bilen meşgullanmaga, özüne bolan ynamyny ösdürmäge we jemgyýetiň bir bölegine öwrülmäge mümkinçilik berer. Maksatnama 7 ýaşdan 18 ýaşa çenli bolan 10 sany çaga gatnaşar. Olar ýörite sport arabalaryny, tälimçiniň goldawyny alarlar we halkara standartlaryna laýyklykda ýörite sapaklary geçerler. Ylmy barlaglaryň görkezişi ýaly, arabada tennis oýnamak diňe bir beden saglygyny gowulandyrmak bilen çäklenmän, eýsem durmuşdaky gatnaşyklara hem ýardam edýär, özüne oňyn tarapdan garamagy emele getirýär we maýyplygy bolan çagalary jemgyýetdäki durmuşyň jümmüşine çekýär.
