2026-njy ýylda geçiriljek dünýä çempionatynyň «Aziýa» zolagynda geçirilen saýlama oýunlaryň üçünji raundynyň ýedinji tapgyrynyň oýunlary geçdi. Ýaponiýa dünýä çempionatyna gönümel ýollanma alan ilkinji ýygyndy topar boldy.

Eýran BAE-ni 2-0 hasabynda ýeňenden soň 19 utuk bilen «A» toparçada birinji orunda barýar. Özbegistanyň ýygyndysy dartgynly oýunda Gyrgyzystany 1-0 hasabynda ýeňenden soň 16 utuk bilen ikinji ýeri eýeleýär. Gyrgyzystanyň ýygyndysy Said Dasiýew oýundan çykarylandan soň 24-nji minutdan başlap on bolup oýnamaly boldy, 40-njy minutda bolsa olaryň derwezeçisi Eržan Tokotaýew Eldor Şomurodowyň ýerine ýetiren on bir metrlik jerimesini gaýtarmagy başardy. BAE we Katar 10 utuk bilen üçünji ýeri eýeleýärler (Katar Demirgazyk Koreýany 5:1 hasabynda ýeňipdi). Gyrgyzystanyň bary-ýogy 3 utugy bar, Demirgazyk Koreýa bolsa 2 utuk bilen ýaryş tertibinde soňky orunda barýar.

«B» toparçada Koreýa Respublikasy Oman bilen 1-1 hasabynda deňme-deň oýnandan soň 15 utuk bilen öňde barýar. Iordaniýa bilen Yrak hersi 12 utuk bilen ikinji ýeri eýeleýärler. Häzire çenli Oman 7 utuk, Kuweýt 5, Palestina 3 utuk toplady.

«C» toparçada Ýaponiýa Bahreýni 2-0 hasabynda ýeňenden soň 19 utuk toplady we 2026-njy ýyldaky dünýä çempionatynda çykyş etmäge hukuk gazandy. Gollary Daiti Kamada (66-njy minutda) we Takefusa Kubo (87-nji minutda) tora girizdi. Awstraliýa Indoneziýany 5-1 hasabynda ýeňenden soň 10 utuk bilen ikinji ýerde barýar. Saud Arabystany Hytaýy ýeňenden soň 9 utuk bilen üçünji ýere geçdi (1:0). Indoneziýa, Bahreýn we Hytaý hersi 6 utuk bilen dördünji orny paýlaşýarlar.

Mälim bolşy ýaly, saýlama oýunlaryň düzgünine görä, her toparçadan iň oňat iki ýygyndy topar 2026-njy ýyldaky dünýä çempionatyna gönüden-göni gatnaşýar. Üçünji we dördünji orny eýelän ýygyndy toparlar dördünji raunda çykarlar we şol ýerde olar ýene-de iki göni ýollanma gazanmak ugrunda we yklymara pleý-off ýaryşyna çykmak üçin özara göreşerler. 2026-njy ýyldaky dünýä çempionaty ABŞ-da, Kanadada we Meksikada 15-nji iýundan 13-nji iýul aralygynda geçirilip, oňa 48 topar gatnaşar.