«Awaza» milli syýahatçylyk zolagynda söwda, ulag we maglumat alyşmak ulgamynda bar bolan mümkinçilikleri giňeltmek üçin amallary ýönekeýleşdirmek boýunça 18-nji halkara okuw-seminary geçirildi.

«Türkmenistan: Altyn asyr» neşiriniň habar berşi ýaly, okuw-seminary Birleşen Milletler Guramasynyň Ýewropa Ykdysady Komissiýasy we Birleşen Milletler Guramasynyň Merkezi Aziýanyň ykdysadyýetleri üçin ýörite maksatnamasy tarapyndan guraldy.

Iki günüň dowamynda okuw-seminara gatnaşyjylar Hytaýdan, Gazagystandan, Hazar deňzinden, Azerbaýjandan, Gruziýadan we şondan soňra Türkiýäniň hem Ýewropa ýurtlarynyň üstünden geçýän Hazarüsti halkara ulag ugrunyň çäklerinde ýük daşamak barada maglumatlary alyşmagyň meselelerini ara alyp maslahatlaşdylar.

Şunda maglumat alyşmagyň Birleşen Milletler Guramasynyň Söwdanyň we elektron işewürlik amallarynyň düzgünlerini ýeňilleşdirmek boýunça merkeziniň standartlaryna laýyk gelmelidigi nygtaldy. Bu Merkez Birleşen Milletler Guramasynyň Ýewropa Ykdysady Komissiýasynyň kömekçi hökümetara guramasy bolup, ol telekeçilik, şeýle hem döwlet işewürlik amallaryny öz içine almak bilen, söwdanyň we elektron işewürlik amallarynyň standartlarynyň düzgünlerini ýeňilleşdirmek boýunça utgaşdyryjy düzüm bolup çykyş edýär.

Bu okuw-seminara «Türkmendeňizderýaýollary», «Türkmendemirýollary», «Türkmenawtoulaglary», «Türkmenaragatnaşyk», «Türkmenhowaýollary» agentlikleriniň, Türkmenistanyň Döwlet gümrük gullugynyň, şeýle hem BMG-niň Merkezi Aziýanyň ykdysadyýetleri boýunça ýörite maksatnamasyna gatnaşýan ýurtlaryň degişli bölümleriniň wekilleri gatnaşdylar – diýlip, neşirde bellenýär.