Türkmenistanyň Ýokary kazyýetinde Türkmenistanyň kazylarynyň VII maslahaty geçirildi. Oňa ýurduň kazyýet edalarynyň kazylary we kazyýet işgärleri gatnaşdylar. Bu barada TDH habar berýär.
Bellenilişi ýaly, maslahata gatnaşyjylar ilki bilen gurnalan göçme sergä aýlanyp gördüler. Sergide Türkmenistanyň Prezidentiniň we Gahryman Arkadagyň kitaplary, şeýle hem ýurduň görnükli suratkeşleriniň we heýkeltaraşlarynyň eserleri aýratyn orun aldy.
Maslahatyň dowamynda Türkmenistanyň kazyýet ulgamyny ösdürmegiň 2022–2028-nji ýyllar üçin Maksatnamasyna laýyklykda geçen 2024-nji ýylda durmuşa geçirilen işler seljerildi. Milli kanunçylygy öňdebaryjy halkara tejribesinden ugur alyp özgertmek, ýurdumyzyň hemmetaraplaýyn ösüşinde kazyýet ulgamynyň işiniň netijeli häsiýetini, ykdysady giňişligiň bitewüligini we ygtybarlylygyny has-da pugtalandyrmak, raýatlaryň hukuklaryny hem-de azatlyklaryny, döwlet we jemgyýetçilik bähbitlerini goramagy ýokary derejede alyp barmak, kazyýet kararlarynyň adalatly, kanuny we esasly bolmagy hem-de hili babatda kazylaryň jogapkärçiligini ýokarlandyrmak barada maslahatda giňişleýin çykyşlar edildi.
Maslahatda kazyýet hakynda ýurdumyzyň kanunçylygyny kämilleşdirmek boýunça alnyp barylýan işler boýunça çykyşlar edildi. Öňdebaryjy halkara tejribesinden ugur alnyp, kazyýet ulgamynyň işini ösdürmek, kazyýet kararlarynyň hilini has-da kämilleşdrimek babatda birnäçe teklipler öňe sürüldi.
Kazyýet edaralarynyň işiniň we kazyýet önümçiliginiň kanunçylyk binýadyny has-da kämilleşdirmek, kazylaryň we kazyýet işgärleriniň hünär ussatlyklaryny we bilim derejelerini ýokarlandyrmak, kazyýetleriň maddy-enjamlaýyn binýadyny pugtalandyrmak we sanly tehnologiýalaryň mümkinçiliklerini ornaşdyrmak ýaly wajyp wezipeleri amala aşyrmak boýunça teklipler öňe sürüldi.
Türkmenistanyň kazylarynyň VII maslahatynyň jemleri boýunça karar kabul edildi.