Girmek
Ýewropa Geňeşiniň Prezidenti Antoniu Kosta Ýewropa Bileleşiginiň Prezidenti Ursula fon der Lýaýen bilen bilelikde ilkinji «ÝB — Merkezi Aziýa» sammitine gatnaşmak üçin Özbegistana sapar bilen geler. Sammit 3-4-nji aprelde geçiriler. Bu barada Ýewropa Geňeşiniň ýaýradan metbugat beýanatyna salgylanyp, «nCa» portaly habar berdi.
Özbegistanyň Prezidentiniň başlyklyk etmegine geçiriljek sammite Gazagystanyň, Gyrgyzystanyň, Täjigistanyň hem-de Türkmenistanyň ýokary derejeli wekiliýetleriniň gatnaşmagyna garaşylýar.
Bellenilişi ýaly, sammit ÝB üçin Merkezi Aziýa bilen sebitleýin hyzmatdaşlygy giňeltmek babatda täze gözýetimleri açar.
Mundan başga-da, 4-nji martda Aşgabatda «ÝB — Merkezi Aziýa» formatyndaky dialogyň 20-nji ministrler duşuşygy geçiriler. Onda, esasan, öňde boljak ilkinji «ÝB — Merkezi Aziýa» sammitine taýýarlyk görmek bilen bagly meseleler ara alnyp maslahatlaşylar.
Ýeri gelende bellesek, Ýewropa Bileleşigi Merkezi Aziýa ýurtlarynyň esasy söwda hyzmatdaşlarynyň biridir. Şeýle-de sebite gönükdirilen daşarky maýa goýumlaryň 40 göterimden gowragy ÝB-niň paýyna düşýär.