Türkmenistanyň Prezidenti Serdar Berdimuhamedow «Galkynyş» milli at üstündäki oýunlar toparyny Monako Knýazlygynyň Monte-Karlo şäherinde geçirilen halkara sirk sungaty festiwalynda Baş baýraga hem-de ýörite baýraklara mynasyp bolmagy mynasybetli gutlady. Türkmen metbugatynda çap edilen gutlagda şeýle diýilýär:

«Hormatly «Galkynyş» milli at üstündäki oýunlar toparynyň agzalary!

Sizi Halkara parahatçylyk we ynanyşmak ýylynyň ilkinji aýynda Monako Knýazlygynyň Monte-Karlo şäherinde geçirilen halkara sirk sungaty festiwalynda gazanan uly üstünligiňiz, ýagny Baş baýraga hem-de ýörite baýraklara mynasyp bolmagyňyz bilen tüýs ýürekden gutlaýaryn.

Berkarar döwletiň täze eýýamynyň Galkynyşy döwründe Garaşsyz, hemişelik Bitarap döwletimizde sirk sungaty yzygiderli ösdürilýär. Türkmen halkynyň Milli Lideri Gahryman Arkadagymyzyň başlangyjy bilen ýurdumyzda sirk sungaty has-da kämilleşdirildi. Häzirki döwürde milli sirk sungatynyň gerimini giňeltmek hem-de halkara hyzmatdaşlygy ösdürmek ugrunda giň möçberli işler alnyp barylýar. Biz bu ugurdaky işlerimizi geljekde hem dowam ederis.

Gadyrly milli at üstündäki oýunlar toparynyň agzalary!

Bilşiňiz ýaly, Arkadag şäheriniň Görogly adyndaky döwlet atçylyk sirkinde at üstünde oýnalýan milli oýunlary kämilleşdirmek üçin ähli şertler döredildi. Munuň özi ýurdumyzda sirk sungatynyň has-da ösdürilýändiginiň aýdyň güwäsidir. Gahryman Arkadagymyzyň başlangyjy bilen döredilen «Galkynyş» milli at üstündäki oýunlar topary yzygiderli ýeňiş gazanyp, Watanymyzyň abraýyna abraý goşýar.

«Galkynyş» toparynyň türgenleri diňe bir ýurdumyzda däl, eýsem, dünýäniň ençeme döwletlerinde geçirilýän halkara bäsleşiklerde baş baýraklara mynasyp bolup, türkmen tuguny belende galdyrdylar. Sirk dünýäsiniň iň meşhur bäsleşigi hasaplanýan Monte-Karlo sirk sungaty festiwalynda hem «Galkynyş» topary täsin çykyşlary bilen tomaşaçylary we emin agzalaryny haýran galdyrdy.

Hormatly «Galkynyş» milli at üstündäki oýunlar toparynyň agzalary!

Siziň Monte-Karlo şäherinde geçirilen halkara sirk sungaty festiwalynda Baş baýraga hem-de ýörite baýraklara mynasyp bolmagyňyz ýurdumyzyň halkara abraýyny belende göteren şatlykly waka boldy. Sizi uly üstünligiňiz — beýik ýeňşiňiz bilen ýene-de bir gezek tüýs ýürekden gutlaýaryn, Size berk jan saglyk, alyp barýan işleriňizde uly üstünlikleri arzuw edýärin».