Şu gün Daşkent şäherinde Türkmenistan Ministrler Kabinetiniň Başlygynyň orunbasary, daşary işler ministri Raşid Meredowy Özbegistan Respublikasynyň Prezidenti Şawkat Mirziýoýew kabul etdi.
Özbek Lideriniň Metbugat gullugynyň habar bermegine görä, söhbetdeşligiň başynda ministr Raşid Meredow Türkmenistanyň Prezidenti Serdar Berdimuhamedowyň we türkmen halkynyň Milli Lideri Gurbanguly Berdimuhamedowyň Prezident Şawkat Mirziýoýewe iberen salamyny we iň gowy arzuwlaryny beýan etdi.
Bellenilişi ýaly, söhbetdeşler türkmen-özbek dostlukly gatnaşyklary we hoşniýetli goňşuçylyk hem-de stretegik hyzmatdaşlygy mundan beýläk-de ösdürmek bilen baglanyşykly meseleleri ara alnyp maslahatlaşdylar.
2024-nji ýylda 1,1 milliard dollardan geçen söwda dolanyşygynyň çalt depginde ösmegi kanagatlanma bilen bellendi. Şunda «Şawat – Daşoguz» serhetýaka söwda zolagynyň gurluşyk işi ýokary depginde alnyp barylýar. Özara peýdaly senagat hyzmatdaşlygy, energetika, ulag-logistika, oba hojalygy we suwdan rejeli peýdalanmak ýaly ugurlarda hyzmmatdaşlyk üstünlikli dowam edýär. Sebitara medeni-ynsanperwer gatnaşyklara hem möhüm ähmiýet berilýär. Ministr R.Meredow Türkmenistanyň Hökümetiniň adyndan Özbegistanyň Liderine Daşkent şäherinde Gurbanguly Berdimuhamedowyň özbek diline neşir edilen «Hakyda göwheri» atly täze kitabynyň tanyşdyrylyş dabarasynyň ýokary guramaçylykda geçirilendigi üçin çuňňur minnetdarlyk bildirdi.
Gepleşigiň dowamynda Türkmenistan bilen Özbegistanyň arasynda köptaraplaýyn hyzmatdaşlygyň täze giňişleýin gün tertibiniň döredilmegine, ýakyn wagtda boljak ýokary derejeli saparlara taýýarlyk görülmegine, sebitiň döwlet Baştutanlarynyň maslahatyna we «Merkezi Aziýa+» görnüşindäki sammitlere aýratyn üns berildi. Şeýle-de halkara gün tertibindäki meseleler boýunça pikir alşyldy.
