Galmyk döwlet uniwersitetiniň we Magtymguly adyndaky Türkmen döwlet uniwersitetiniň wekilleriniň arasynda onlaýn duşuşyk geçirildi. Duşuşykda bilim pudagynda ikitaraplaýyn hyzmatdaşlygyň geljegi ara alnyp maslahatlaşyldy.
Bu barada «Türkmenistan: Altyn asyr» elektron neşiri habar berdi.
Duşuşyga gatnaşyjylar goşa diplom meýilnamasyny, mugallymlar we talyplar üçin akademiki alyş-çalyşlary hem öz içine alýan bilelikdäki bilim maksatnamalaryny durmuşa geçirmegiň mümkinçiliklerine garadylar.
Duşuşykda ýokary okuw mekdepleriniň ýolbaşçylary uniwersitetleriň häzirki ýagdaýy, maddy-tehniki binýady we halkara hyzmatdaşlygynyň mümkinçilikleri barada maglumat alyşdylar.
Duşuşykda öňe sürlen esasy teklip daşary ýurtly mugallymlary degişli hünärler boýunça umumy okuw sapaklaryny bermäge çekmek barada boldy. Taraplar ylym-bilim ulgamynda uzakmöhletleýin hyzmatdaşlygy ösdürmäge özara gyzyklanmalaryny beýan etdiler.
Duşuşykdan soň gatnaşyjylar gepleşikleri dowam etdirmäge we ýokary bilim ulgamynda bilelikdäki täze başlangyçlary ösdürmäge taýýardyklaryny mälim etdiler.
