Watan goragçylarynyň gününiň öň ýanynda welaýatyň Kerki etrabynda Türkmenistanyň Döwlet migrasiýa gullugynyň Lebap welaýaty boýunça müdirliginiň Kerki etrap bölüminiň durky düýpli täzelenen edara binasy dabaraly ýagdaýda açylyp ulanylmaga berildi. Bu barada «Türkmenistan: Altyn asyr» saýtynda habar berildi.

Habarda bellenilişi ýaly, açylyş dabarasy oňa gatnaşyjylaryň hoşallyk çykyşlary, etrabyň medeniýet we sungat ussatlarynyň şowhunly çykyşlary bilen utgaşdy.

Täze bina häzirki döwrüň iň kämil enjamlary bilen üpjün edilip, gullugyň işgärleriniň ýokary derejede iş alyp barmaklary üçin ähli şertler döredilipdir.

Hususan-da, bu ýerde elektron maglumatlaryny almak we olary resmileşdirmek sanly ulgamyň üsti bilen amala aşyrylar, şeýle hem internet ulgamynda bölümiň ýörite internet sahypasy hereket eder.

Edara binasynyň pasport bölüminde raýatlaryň birbada 8-sini kabul edip, sähelçe wagtda olaryň möhümini bitirmäge şertler bar. Ähli resminamalar taýýar edilip, bu ýerde kabul edilenden soňra ýurduň raýatynyň Türkmenistandan gitmek we Türkmenistana gelmek üçin pasporty bary-ýogy bir aýyň dowamynda taýýar bolýar. Şeýlelikde, indi raýatlar köp wagtyny ýitirmän, pasport alyp bilýärler. Bu ýerde oturdylan elektron enjamlar raýatlaryň nobatyny ýöredýär we olara degişli maglumatlary berýär.

Kerki we Hojambaz etraplarynyň raýatlaryna hyzmat edýän bu täze binada nobatçylyk, arhiw, raýatlyk, wiza we daşary ýurt raýatlaryny hasaba alyş bölümleri-de hereket edýär diýlip, türkmen metbugatynda bellenilýär.