Türkmenistan halkara forumlaryny BMG-nyň baýdagynyň astynda hem geçirer, Astrahanda Aşgabat we Türkmenbaşy şäherlerine uçuşlaryň ýola goýulmagy maslahatlaşylýar, Türkmenistanyň we Gazagystanyň DIM-leriniň ýolbaşçylarynyň arasynda telefon arkaly söhbetdeşlik boldy we beýleki habarlar
Türkmenistanda
1. Türkmenistanda geçiriljek halkara forumlar ýurduň milli baýdagynyň we BMG-niň baýdagynyň astynda geçiriler. Bu barada türkmen halkynyň Milli Lideri, Halk Maslahatynyň Başlygy Gurbanguly Berdimuhamedow BMG-niň Baş sekretary Antoniu Guterreş bilen telefon arkaly gepleşiginde nygtady. BMG-niň Baş sekretary Türkmenistanyň halkara giňişlikde öňe sürýän ähli başlangyçlarynyň häzirki wagtda örän derwaýysdygyny belledi hem-de ýurdumyzyň bitaraplyk, parahatçylyk söýüjilik ýörelgeleri esasynda bu ugurda durmuşa geçirýän işlerini goldaýandygyny ýene-de bir gezek tassyklady.
2. Astrahan oblasty bilen Türkmenistanyň arasynda Astrahan – Aşgabat we Astrahan – Türkmenbaşy ugurlary boýunça howa gatnawlarynyň ýola goýulmagynyň mümkinçiligi öwrenilýär. Bu barada Astrahan oblastynyň daşary gatnaşyklar ministri Wladimir Golowkow žurnalistler bilen geçiren duşuşygynda belledi.
3. Türkmenistanyň daşary işler ministri Raşid Meredow Gazagystanyň DIM-niň ýolbaşçysy Murat Nurtleu bilen telefon arkaly söhbetdeş boldy. Onuň dowamynda ikitaraplaýyn hyzmatdaşlygyň meseleleri ara alnyp maslahatlaşyldy. Söhbetdeşler halkara gün tertibiniň esasy ugurlary barada pikir alyşdylar hem-de sebit we halkara düzümleriň çäklerinde özara gatnaşyklary dowam etdirmegiň ähmiýetini tassykladylar.
4. Koreýa Respublikasynyň Türkmenistandaky ilçihanasy Aşgabatda geçiriljek 99-njy «TOPIK-2025» koreý dili synagyna gatnaşmak üçin hasaba alnyşyň başlandygyny habar berdi. Gyzyklanýan taraplar Döwletmämmet Azady adyndaky Türkmen milli dünýä dilleri institutyna baryp, 17 – 28-nji ýanwar aralygynda ýüz tutup bilerler.
5. Türkmenistan Yslamabatdaky Pakistan Milli sungat geňeşiniň galereýasynda geçirilen «Kalligrafiýa we sungat sergisiniň öçmez aýdyňlygy» atly sergä gatnaşdy. Türkmenistanyň ilçihanasy tarapyndan görkezilen gymmatlyklarda türkmen medeniýetiniň gözelligi we dürlüligi, baý taryhy hem-de döwrebaplygy öz beýanyny tapdy.
6. Aşgabatda Türkmenistanyň daşary işler ministri Raşid Meredow bilen Hytaý Halk Respublikasynyň daşary işler ministriniň kömekçisi Lýu Biniň arasynda duşuşyk geçirildi. Taraplar halkara we sebit gurluşlarynyň, ilkinji nobatda, BMG-niň çäginde Türkmenistan bilen Hytaýyň arasyndaky üstünlikli hyzmatdaşlyk barada durup geçip, köp sanly meselä garadylar.
Dünýäde
7. Yzygiderli artýan semizlik meselesine garşy göreşmek üçin Maltanyň hökümeti sagdyn durmuş ýörelgesini goldamak maksatnamasyny ýola goýdy. 18 ýaşdan 20 ýaş aralygyndaky ýaşlar alty aýlap fitnes merkezlerine mugt gatnap bilerler. Bazarda şeýle ýazylyşygyň bahasy 225-den 450 ýewro çenli üýtgeýär. Bütindünýä semizlige garşy göreşmek federasiýasynyň berýän maglumatlaryna görä, 2030-njy ýyla çenli uly ýaşly maltalylaryň 30%-den gowragy semizlik bilen bagly kynçylyklara duçar bolup biler. Bu maksatnama ýakyn wagtda güýje girer we Maltanyň häkimiýeti ýaş nesilde yzygiderli bedenterbiýe bilen meşgullanmak endigini ösdürmäge kömek eder diýip umyt edýärler.
8. Repçi we telekeçi Kanýe West «YZY SL-01» atly täze aýakgap nusgasyny çykardy we satuwyň ilkinji gününde 2,3 million dollar gazandy. Minimalist stilde öndürilen we rezin tapoçkalary ýada salýan täze önüm 20 dollarlyk elýeterli bahadan satuwa çykaryldy. Aýakgabyň dizaýny ýönekeýligi bilen tapawutlanýar: brendiň ýeke-täk elementi ýuka dabana möhürlenen sanlardyr.
Sport täzelikleri
9. Türkmenistanyň milli ýygyndysynyň iki oýunçysy Belarusyň ýokary ligasynyň klublarynda synagdan geçmek üçin bu ýurda ugradylar. Hüjümçi Meýlis Diniýew «Witebsk» klubyna bardy, ol ýerde eýýäm birnäçe wagtdan bäri onuň watandaşy – goragçy Wepa Jumaýew çykyş edip gelýär. Ýarym goragçy Teýmur Çaryýew Žodino şäheriniň «Torpedo-BelAZ» komandasynda synag barlagyndan geçýär. 24 ýaşly ýarym goragçy Gyrgyzystanyň «Abdyş-Ata» klubynda oýnap, onuň düzüminde iki gezek şol ýurduň çempiony bolanlygy bilen bellidir.
