Türkmen-eýran serhedindäki Artyk gözegçilik-geçiriş ýerinde iki ýurduň arasynda ulag hyzmatdaşlygyny giňeltmäge gönükdirilen Artyk (Türkmenistan) we Lotfabad (Eýran) serhet geçelgeleriniň ýolbaşçylarynyň üçünji duşuşygy geçirildi – diýip, Eýranyň Türkmenistandaky ilçihanasynyň X sahypasynda habar berilýär.
Netijeli gepleşikleriň dowamynda iki ýurduň wekilleri üstaşyr ýük daşamalaryny optimizirlemek we ösdürmek boýunça çäreleriň toplumyny ara alyp maslahatlaşdylar. Ýük düşürip-ýüklemek işlerini kämilleşdirmek we bu serhet geçelgesiniň üsti bilen ýolagçy gatnawyny gowulandyrmak meselelerine aýratyn üns berildi.
Duşuşygyň dowamynda taraplar ýük we ýolagçy ulaglarynyň serhetden geçiş amallaryny ýeňilleşdirmegiň anyk mehanizmlerini hem ara alyp maslahatlaşdylar.
