Halk Maslahatynyň Başlygy 2025-nji ýylda geçiriljek çäreler boýunça guramaçylyk döwlet toparynyň mejlisini geçirdi, Türkmenistanyň hemişelik Bitaraplygynyň 30 ýyllygy mynasybetli ýubileý medaly dörediler, Halkara parahatçylyk we ynanyşmak ýylynda Türkmenistanda önümleriň dürli görnüşleri hödürlenýän söwda nokatlary açylar we beýleki habarlar
Türkmenistanda
1. Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Türkmenistanyň Bitaraplygynyň 30 ýyllygy hem-de Halkara parahatçylyk we ynanyşmak ýyly mynasybetli çäreleri ýokary derejede geçirmek boýunça döredilen guramaçylyk döwlet toparynyň mejlisini geçirdi. Oňa Mejlisiň Başlygy hem-de Ministrler Kabinetiniň agzalary gatnaşdylar.
3. Gurbanguly Berdimuhamedow wise-premýer T.Atahallyýewe ýüzlenip, baýramçylyk saçaklaryny bezejek naz-nygmatly harytlar, milli tagamlar bilen bagly degişli teklipleri taýýarlamagy tabşyrdy. Wise-premýer N.Atagulyýewe Aşgabat şäherinde hem-de welaýatlarda söwda nokatlaryny açyp, olarda dürli görnüşli harytlaryň, şol sanda milli sowgatlyk we ýadygärlik harytlaryň söwdasynyň ýokary hilli guralmagyny üpjün etmek tabşyryldy.
5. Türkmen halkynyň Milli Lideri halkara çäreleriň köpçülikleýin habar beriş serişdelerinde ýokary derejede beýan edilmelidigine ünsi çekdi. Halk Maslahatynyň Başlygy medeniýet ulgamyna gözegçilik edýän wise-premýer M.Mämmedowa ýüzlenip, medeni-köpçülikleýin we baýramçylyk çäreleriniň ýokary derejede guralmagyny üpjün etmek barada tabşyryklary berdi, wise-premýer B.Orazdurdyýewa bolsa geçiriljek çäreler bilen bagly halkara ylmy-amaly maslahatlary guramak boýunça degişli teklipleri taýýarlamak tabşyryldy.
6. Hindistan Halkara parahatçylyk we ynanyşmak ýylynyň çäginde ähli dabaralara we çärelere işjeň gatnaşmak isleýär. Bu barada Hindistanyň Türkmenistandaky ilçisi Madhumita Hazarika Bhagat mälim etdi. «Birleşen Milletler Guramasy Türkmenistanyň başlangyjy bilen 2025-nji ýyly «Halkara parahatçylyk we ynanyşmak ýyly» diýip yglan etdi. Hindistan milli syýasatymyza we garaýyşlarymyza doly laýyk gelýän bu başlangyjy işjeň goldaýar. BMG-niň bu kararyny goldaýarys hem-de Hindistanyň parahatçylyk we ynam ýörelgelerini öňe sürýändigi sebäpli bu kararyň durmuşa geçirilmegi bilen baglanyşykly ähli çärelere işjeň gatnaşmak isleýäris» diýip, ilçi Prawasi Bharatiýa Diwas baýramy mynasybetli Hindistanyň Aşgabatdaky ilçihanasynda guralan çärede belledi.
7. Ýanwar aýynyň başynda Kabulda Owganystanyň magdan we nebit ministriniň wezipesini ýerine ýetiriji Hidaýatulla Badri bilen «TAPI Pipeline Company Limited» kompaniýasynyň baş direktory Muhammetmyrat Amanowyň arasynda duşuşyk geçirildi. Taraplar TOPH gaz geçirijisiniň taslamasynyň soňky ýagdaýy we galan işleri çaltlaşdyrmak bilen baglanyşykly meseleleri ara alyp maslahatlaşdylar. Owganystanlylar üçin täze iş orunlaryny döretmäge we taslama gatnaşýan owgan inženerleriniň hünär derejesini ýokarlandyrmaga aýratyn üns çekildi.
8. Russiýanyň Tebigy baýlyklar ministrliginiň «Ekologiýa» Bütinrussiýa ylmy-gözleg institutynyň direktorynyň orunbasary Wadim Petrow Türkmenistandaky ýarym asyrdan gowrak üznüksiz ýanyp duran Derweze gaz kraterini söndürmegiň üç mümkin bolan usulynyň bardygyny nygtady. Petrowyň sözlerine görä, birinji usul oňa kislorodyň barmagyny bes etmek üçin krateri çäge we toýun ýaly oda çydamly materiallar bilen doldurmakdan ybarat bolup durýar. Ikinji usuly krateriň üstünde gaz geçirmeýän, aşa gyzgynlyga çydamly örtük döretmek arkaly ýerine ýetirip bolar. Üçünji usuly amala aşyrmak üçin kraterden çykýan gazyň basyşyny peseltmek hem-de onuň akymyny başga tarapa gönükdirmek maksady bilen, goşmaça guýulary gazmaly bolar. Şunda bilermen teklip edilen usullaryň islendik birini durmuşa geçirmegiň tehniki taýdan çylşyrymly we maliýe taýdan gymmat düşjekdigini belleýär.
Dünýäde
9. ABŞ-nyň Kaliforniýa ştatynda abraýly kenarýaka sebitlerinde bolup geçen tokaý ýangynlary sebäpli adatdan daşary ýagdaý yglan edildi. Aýratyn hem kaşaň Paliseýds etrabyna has köp zeper ýetdi, ýangyn bu ýerden Malibunyň çägine we Golliwud depelerine ýaýrady. Betbagtçylygyň gerimi şeýle bir uly welin, ýangynyň şöhlesini hatda Los-Anjelesiň howa menzilinden uçýan uçarlardan hem görünýär. Häkimiýetler 150 müň ýaşaýjyny ewakuasiýa etdi. Ýollarda ýüze çykan dyknyşyklar sebäpli köp adam awtoulaglaryny taşlap gaçmaly bolýar, ýol gullugy bolsa buldozerleriň kömegi bilen ýollary arassalamaga mejbur bolýar.
Sport täzelikleri
10. FIFA-nyň Global futbol ösüşi bölüminiň bilermeni Röwşen Meredow Türkmenistanyň Futbol federasiýasynyň tehniki direktory wezipesine bellenildi. Meredow öz futbol ýoluny 1999-njy ýylda «Nebitçi» toparynda başlapdy. Soňky ýyllarda ol «Dagdan», «Galkan», «Ahal» we «Ýedigen» klublarynda çykyş etdi. Futbolçy hökmünde karýerasyny tamamlandan soň, Röwşen Meredow tälimçilik işine geçýär. Onuň ýolbaşçylygynda 2014-nji ýylda Aşgabadyň «Ýedigen» kluby AFK-nyň Prezidentiniň Kubogyny gazandy. Şeýle hem hünärmen Özbegistanyň we Gyrgyzystanyň ýokary diwizionlarynda çykyş edýän toparlara ýolbaşçylyk etdi.
11. Türkmen döwlet bedenterbiýe we sport institutynyň «Talap Sport» basketbol topary ýurduň çempionatynda bir duşuşykda-da ýeňilmän, ynamly ýeňiş gazandy. Bäsleşik 17-22-nji dekabr aralygynda Aşgabatda geçirildi. Ýaryşa alty topar gatnaşdy. Türkmenistanyň Goranmak ministrliginiň «Milli goşun» topary kümüş medal gazandy. Türkmenistanyň Gurluşyk we binagärlik ministrliginiň «Gurluşykçy» toparynyň basketbolçylary bürünç medala mynasyp boldular.
