«Daşoguzgallaönümleri» önümçilik birleşiginiň Görogly etrabyndaky galla önümleri kärhanasynda 2024-nji ýylda önümçiligiň ähli ugurlary boýunça oňat görkezijiler gazanyldy. «Türkmenistan» gazetinde berilýän habara görä, bu ýerde ýylyň dowamynda jemi 23 million 350 müň manatlykdan gowrak önüm öndürilip, göz öňünde tutulan meýilnama artygy bilen berjaý edildi.
Habarda bellenilişi ýaly, kärhana boýunça bir ýylda 30 müň tonna golaý un öndürilip, 101 göterim ösüş depgini üpjün edildi. Geçen ýyl öndürilen çörek we çörek önümleriniň möçberi 433 tonna, kepegiň öndürilişi 9 müň 645 tonna barabar boldy. Önümçiligiň bu görnüşleri boýunça hem 101,2 göterim ösüş gazanyldy. Işleriň kadaly guralmagy, kämil tehnologiýalaryň bökdençsiz işledilmegi önümçilik kuwwatynyň ýokarlanmagyny, ak bugdaýyň ygtybarly saklanmagyny we öndürilýän önümiň hiliniň we görnüşleriniň artmagyny üpjün edýär.
Kärhananyň gije-gündiziň dowamynda 200 tonna bugdaýy gaýtadan işlemek, ondan 150 tonna ak un öndürmek, şeýle-de ýanaşyk gurlan elewatorda 50 müň tonna dänäni saklamak mümkinçiligi bar diýlip, habarda bellenilýär.
