Tohoku uniwersitetiniň professory Hiroşi Ýoşidanyň täzeden geçiren barlagyna görä, Ýaponiýadaky demografik ýagdaý ozal çaklanylandan has çalt ýaramazlaşýar. RIA Nowosti saýtynyň habar berişi ýaly, häzirki ýagdaý şunuň ýaly dowam eden halatynda, 2720-nji ýylyň 5-nji ýanwarynda ýurtda 14 ýaşdan kiçi diňe bir çaga galar — bu öňki çaklamalarda bellenen möhletden bir asyr irdir.
Bu howatyrly ýagdaýy yzarlamak üçin ýörite onlaýn sagat döredildi. 2024-nji ýylyň dogluş statistikasyna esaslanan täze hasaplamalar 2023-nji ýylyň aprelinde edilen çaklamadan ep-esli tapawutlanýar, şondaky maglumat boýunça iň howply ýagdaýa 2821-nji ýylyň 27-nji oktýabrynda garaşylýar diýlip hasaplanýardy.
Ýaponiýada çaga dogluş derejesi eýýäm taryhy peselişe ýetdi. Bu ýurduň ylmy-barlag institutlarynyň edýän çaklamasyna görä, 2024-nji ýylda täze doglan çagalaryň sany ilkinji gezek 700 müňden pes derejä düşer - bu ýurduň hökümeti tarapyndan 2038-nji ýyldan ir garaşylmaýan wakadyr.
Ýurduň häzirki demografik düzümi uly deňsizligi açyp görkezýär: 15 ýaşa çenli çagalar ilatyň diňe 11 göterimini düzýär, 65 ýaşdan uly adamlaryň paýy bolsa ýurduň ilatynyň 30 göterimine golaýdyr.
