Türkmenistanyň Prezidenti Serdar Berdimuhamedow Belarus Respublikasynyň Türkmenistanda wezipä täze bellenen Adatdan daşary we Doly ygtyýarly ilçisi Stanislaw Çepurnoýy kabul etdi. "Watan" habarlar gepleşiginde habar berlişi ýaly, ilçi türkmen döwletiniň Baştutanyna ynanç hatyny gowşurdy.
Diplomat wagt tapyp kabul edendigi üçin hoşallyk bildirip, Türkmenistanyň Prezidentine we Halk Maslahatynyň Başlygyna Belarus Respublikasynyň Prezidenti Aleksandr Lukaşenkonyň mähirli salamyny we iň gowy arzuwlaryny, şeýle-de däp bolan dostlukly döwletara dialoga ygrarlydygy baradaky sözlerini ýetirdi.
Türkmenistanyň Prezidenti Serdar Berdimuhamedow belarus Liderine mähirli salamyny we hoşniýetli arzuwlaryny beýan edip, ilçini jogapkärli diplomatik wezipä bellenilmegi bilen gutlady.
Duşuşygyň barşynda deňhukuklylyk, birek-birege hormat goýmak, ynanyşmak we netijeli hyzmatdaşlyk ýörelgelerine esaslanýan türkmen-belarus gatnaşyklarynyň häzirki ýagdaýy we geljegi barada gyzyklanma bildirilip pikir alşyldy. Iki ýurduň diňe bir ikitaraplaýyn däl, eýsem, köptaraplaýyn görnüşde, halkara we sebit guramalarynyň, şol sanda BMG-niň we GDA-nyň çäklerinde işjeň hyzmatdaşlyk edýändigi kanagatlanma bilen bellenildi.
Bellenilişi ýaly, döwletara ynsanperwer gatnaşyklara uly ähmiýet berilýär. Türkmenistanyň hem-de Belarus Respublikasynyň ylym-bilim, sport, medeniýet we sungat ulgamlaryndaky ýakyn hyzmatdaşlygy iki ýurduň we halklaryň arasyndaky dostlukly gatnaşyklary pugtalandyrmaga ýardam edýär.
Diplomat Türkmenistanyň döwlet Baştutanyna wagt tapyp kabul edendigi we jogapkärli wezipäni ýerine ýetirmekde üstünlikleri arzuw edendigi üçin ýene-de bir gezek hoşallyk bildirip, däp bolan türkmen-belarus gatnaşyklaryny mundan beýläk-de pugtalandyrmak hem-de iki dostlukly ýurduň we halklaryň bähbidine hyzmatdaşlygy ösdürmek üçin ähli tagallalary etjekdigine ynandyrdy.
