Türkmenistanyň Prezidentiniň ýanyndaky Döwlet gullugy akademiýasynda sanly medeniýet we döwlet dolandyryşyny özgertmek boýunça dört günlük okuw seminary başlady.

Çäre BMGÖM bilen bilelikdäki taslamanyň çäklerinde sanlylaşdyrma boýunça halkara bilermeni, Russiýanyň halklaryň dostlugy uniwersitetiniň emeli aň fakultetiniň professory Wiktor Dostowyň gatnaşmagynda geçirilýär.

Okuw seminaryň esasy maksady döwlet gullukçylaryny häzirki zaman sanly tilsimatlar bilen tanyşdyrmakdan ybaratdyr. Okuw sapaklarynyň dowamynda gatnaşyjylar sanly özgerişleri täze senagat rewolýusiýasy hökmünde öwrenerler, onuň esasy düzüm böleklerini we zähmet bazaryndaky üýtgeşmeleri öz içine alýan sosial netijelerini öwrenerler.

Maliýe institutlary we elektron hökümet ulgamyndaky tehnologiýalara aýratyn üns berler. Maksatnamanyň aýratyn böleginde sanlylaşdyrmanyň draýweri hökmünde emeli aňyň öwrenilmegi, onuň jemgyýetçilik platformalaryndaky funksionaly we raýat jemgyýetiniň ösüşindäki orny öwreniler.

Professor Dostowyň sözlerine görä, bu okuw seminary Türkmenistanyň Döwlet gullugy akademiýasy bilen uzak möhletli hyzmatdaşlygyň bir bölegidir. – Biz sanlylaşdyrma barada ýurt üçin peýdaly boljak nukdaýnazaryndan gürrüň etmäge, ýurduň has netijeli bolmagy we raýatlaryň durmuşynyň gowulandyrylmagy üçin haýsy ädimleriň ädilmelidigini düşünmäge synanyşarys – diýip, bilermen belleýär.

Wiktor Dostow 2025-nji ýylda emeli aň temasynyň möhümdigini hem nygtady. – Häzirki wagtda iň wajyp temalaryň biri – bu emeli aň temasydyr. Biz onuň ösüşiniň geljegini we döwlet hem-de hususy pudakda ulanmak mümkinçiliklerini ara alyp maslahatlaşarys – diýip, professor aýtdy.