Awstriýanyň Hökümet başlygy Karl Nehammer koalision hökümeti düzmek ugrunda üçtaraplaýyn gepleşikler şowsuz tamamlanandan soňra Kansler hem-de Awstriýanyň Halk partiýasynyň başlygy wezipelerini terk etjekdigini habar berdi. Bu barada «INTERFAX.RU» ýazýar.
Öň NEOS liberal partiýasy (Täze Awstriýa we Liberal forum) Awstriýanyň Halk partiýasy hem-de Sosial-demokratik partiýasy bilen bilelikde koalision hökümeti düzmek boýunça gepleşiklerden çykýandygyny yglan edipdi.
Nehammer öz gezeginde üçtaraplaýyn gepleşikleriň barşynda esasy meseleler babatda ylalaşyk gazanylmandygyny nygtady.
Sentýabrda Awstriýada parlament saýlawlary geçip, onuň jemleri boýunça Awstriýanyň Azatlyk partiýasy sesleriň 29,2 göterimini gazanyp, taryhda ilkinji gezek ýeňiş gazandy. Ikinji orunda ýurduň Halk partiýasy (26,48 göterim) we üçünji Sosial-demokratik partiýa (21,05 göterim) ýerleşdi.
Azatlyk partiýasynyň özbaşdak hökümet düzmek üçin parlamentde ýeterlik orny bolmady, beýleki syýasy güýçler bolsa, onuň bilen hyzmatdaşlyk etmekden ýüz öwürdi.
